Преку стотина балкански новинари од неформалната иницијатива „Новинарска мрежа“ јавно ја изразија својата поддршка на колегите од Македонија.
Регионалната неформална иницијатива „Новинарска мрежа“ најостро го осудува физичкиот напад врз екипата на македонскиот портал А1 Он во Скопје, и бара остра и брза реакција на државата, ефикасно полициско и судско процесуирање, како и адекватна реакција на меѓународната заедница и меѓународните организации, пишува хрватскиот веб-портал Лупига.
„Потсетуваме дека медиумската ситуација во Македонија е сè полоша, дека нашите колеги, кои професионално ја вршат својата задача, се изложени на постојани закани и притисоци дека и им е загрозен физичкиот и професионалниот интергитет.
Македонија од година во година е сè пониско на скалата на медиумски слободи, а во извештајот за 2016 година од ‘Фридом Хаус’ за слободата на медиумите, од ‘групата на делумно слободни’ е ставена во ‘групата на неслободни земји’.
Меѓу причините за ваквиот пад се обелоденувањето на масовното и нелегално прислушување на новинарите кое го спроведе Владата, корупциските врски меѓу функционерите и сопствениците на медиумите, како и зголемениот број на закани и напади врз медиумските работници.
Новинарската мрежа солидарно стои покрај своите колеги од А1 Он и останатите независни медиуми во Македонија, а ги повикува, заедно со долупотпишаните колеги и другите новинари и јавни личности од регионот да го осудат овој инцидент“, се вели во соопштението на „Новинарска мрежа“.
Меѓу стотината потписници се Борис Дежуловиќ, Виктор Иванчиќ, Предраг Луциќ од Хрватска, Јета Џара и Уна Хајдари од Косово, Тамара Скроца, Гордана Игриќ и Јована Глигориевиќ од Србија, Сашка Цветковска, Младен Чадиковски, Јадранка Костова од Македонија, Александар Трифуновиќ и Селведин Авдиќ од БиХ, Марин Шириак од Романија, Матеј Звитер и Бранкица Шетковиќ од Словенија, Марија Черешева од Бугарија, Душица Томовиќ од Црна Гора…
