Лавина реакции на социјалните мрежи предизвика Фејсбук страницата на детската градинка “Bleta” („Пчела“) во Чаир, на која беа објавени видеа и фотографии од дечињата од градинката, како вршат ритуални обичаи карактеристични за исламот.
Граѓански новинар од Скопје до редакцијата на ЦИВИЛ Медиа ги испрати фотографиите и видеото од градинката во Чаир, која врши религиозна индоктринација на децата кои ја посетуваат установата. По реакциите на социјалните мрежи, администраторите ја избришале страницата од Фејсбук.
По шпекулациите во јавноста, дека градинката работи нелегално, односно не е пријавена како установа во која се згрижуваат деца од претшколска возраст, ЦИВИЛ Медиа се обиде да стапи во контакт со градоначалникот на Општина Чаир, Изет Меџити, но тој не одговори на нашите повици.
Во регистрите објавени на веб страницата на Министерството за труд и социјална политика, ваква градинка не постои! Ниту како дел од адресарите на јавните установи – детски градинки, ниту во адресарот на приватните детски градинки. Градинката „Пчела“ не е пријавена ниту како агенција за давање услуги за чување и нега на деца од претшколска возраст, ниту како јавен или приватен центар за ран детски развој!
Според една од фотографиите на градинката, изработена како табло, оваа фантомска установа работи веќе неколку години и, како што стои во описот, ја произвела својата „трета генерација“.
ЦИВИЛ Медиа доби потврда од Министерството за труд и социјална политика, дека градинката не е регистрирана, како и дека инспекциската служба денеска излегла на терен. За подетални информации, Министерството најави соопштение.
Маја Ивановска
