Прес центарот на ВМРО-ДПМНЕ работи неуморно. Тој продуцира по најмалку четири во текот на викендот, а меѓу седум и десет соопштенија и изјави за јавноста во работни денови. Како и секогаш, овој прес центар излегува со огромна количина информации и ставови кои ѝ ги нуди на македонската јавност. Многу често, тие ставови се бескрајно повторување на истото, а често се забележува и дека нема за што да се извести јавноста, но се инсистира на квантитетот по секоја цена.
Како и секогаш, тежиштето на сите активности на прес центарот на оваа партија се на активностите и изјавите на нивниот лидер Никола Груевски, кој деновиве често ги посетува СЈО и Кривичен суд. Може да се претпостави, соопштенијата и изјавите одат во насока на дискредитирање на СЈО и на владата. Сепак, најголем дел од материјалот кој секојдневно се лансира во јавноста би можел лесно да се смести во категоријата псевдосодржини или псевдовести.
Подеднакво се застапени содржини во кои е очигледен обидот на партијата да поттикне отпор кон нормализирање и унапредување на меѓуетничките односи во земјата. Со други зборови, се задржува национал-шовинистичката ориентација на партијата и се прават сериозни обиди да се поттикне националистичка нетрпеливост и тензии.
Воедно, партијата вложува сериозни напори да ја нападне и осуети промената на курсот на земјата во поглед на подобрување на добрососедските односи и надминување на долгогодишниот спор со Грција. ЕУ и НАТО интегративните процеси речиси и не се третираат, во согласност со новите декларативни заложби на расклатениот врв на партијата дека се залагаат за евроатлантска интеграција.
Партијата очигледно се колеба и со поимот за конструктивност. Наспроти лутата изјава на Груевски дека ВМРО-ДПМНЕ повеќе нема да биде конструктивна опозиција, се забележува „полифонија“ и во овој поглед. Советниците на партијата во Град Скопје, сепак, најавија конструктивност. Слично нешто, партијата најави и во поглед на процесот за решавање на спорот со името, се разбира, со сите „ама“ и „ако“ и „нема да дозволиме“…
Прес центарот на ВМРО-ДПМНЕ е внимателен и буден. Така, кога ЦИВИЛ објави неофицијална информација дека Груевски се подготвува за оставка на 29 октомври (недела, неработен ден), прес центарот на партијата реагираше експресно, со демант во рок од два часа или помалку.
Тоа покажува дека агитпроп апаратот на ВМРО-ДПМНЕ е сѐ уште во добра кондиција, иако многу конфузен, но тоа не е новост. А оставката, веројатно, е одложена во очекување на развојот на проектот Жан Моне, во надеж дека ќе му биде вратен пасошот на Груевски за патување во Париз, на меѓупартиски разговори за надминување на разликите.
објавено во Плусинфо и Слободен печат (24/11/2017)