Мораториум врз сите градежни зафати во охридскиот регион којшто е ставен целосно под заштита на УНЕСКО, како дел од светското природно и културно наследство, побараа активисти на граѓанската иницијатива „Охрид С.О.С“. Тие деновиве барањата ги испорачаа пред Комитетот за светско наследство на УНЕСКО, на 41 седница, што се одржа во Кравков, Полска.
„Во одлуката на УНЕСКО, по извештајот од реактивната мисија која во Република Македонија престојуваше во април годинава, се налага надлежните во Македонија да се откажат од секциите ‘а’ и ‘е’ од експресниот пат А3 и патот да се симне во подолна категорија. Апелираме до УНЕСКО да наложи целосно повлекување на проектот за експресниот пат A3. Воедно, бараме од актуелната влада да се откаже од секакви идеи за патишта кои ќе поминуваат низ националниот парк ‘Галичица’. Иднината на регионот е во еко-туризам, не во патна инфраструктура низ недопрени и строго заштитени предели, која понатаму секако дека е можно да доведе до урбанизација и дополнителна деградација на природата во националниот парк“, изјавија од „Охрид С.О.С“.
Во обраќањето на 41 седница е спомнато и Студенчишко Блато, потребата од негова итна и сеопфатна заштита и ревитализација со што ќе се дозволи пределот да биде жариште на еко-туризмот, да почне да се развива и научниот туризам, од природни науки, па сè до археологија во околината на Студенчишко Блато.
„Додека ние се бориме со сите сили да го заштитиме и да го зачуваме единственото УНЕСКО подрајче што го имаме, граѓанските движења во развиени земји даваат сè од себе своите да ги стават на Листата на светско наследство во опасност, само поради една зграда или поради одобрен потенцијален проект, каков што е случајот со Виена и Ливерпул“, истакнуваат од „Охрид С.О.С“.
Инаку, граѓанската иницијатива „Охрид С.О.С“ беше единствена организација-набљудувач од Македонија, којашто беше поканета да учествува на оваа седница на УНЕСКО.