Владата на САД го одобри планот за испорака на смртоносно оружје на Украина со цел да ја засили украинската армија, која се бори против сепаратистите поддржани од Русија, информираат американските медиуми, повикувајќи се на официјални претставници, кои побарале да останат анонимни.
Новото оружје вклучува американски противтенковски ракети, кои Украина одамна ги сака, за да ја зајакне својата одбрана. Одлуката веројатно ќе ги зголеми тензиите меѓу САД и Русија.
Стејт департментот, кој ги контролира странските воени продажба, не потврди евентуално испраќање на противтенковски проектили или друго оружје, но изјави дека САД одлучиле да обезбедат „засилени одбранбени способности” на Украина, за да ѝ помогнат да изгради армија на долг рок, да го брани својот суверенитет и да „ја попречи понатамошната агресија”.
– Помошта на САД има исклучително одбранбен карактер, а Украина е суверена земја и има право да се брани, изјавија од еден оддел во Стејт департментот.
Според законот, Стејт департментот мора да го извести Конгресот за планираната воена продажба на странци, а конгресмените можат да ја стопираат продажбата. Конгресмените тешко дека ќе го блокираат планот, со оглед на тоа што и демократите и републиканците веќе долго време побараа ваков чекор.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
