По скоро три години спроведување, „нулта ковид“ мерките ги уништија економиите во кинеските градови како Гуангжу, чии улици се наредени со затворени продавници. Прекинувањето на кинеските ограничувања за „Ковид“ на почетокот на декември требаше да им помогне на места како Гуангжу. Но, хаотичниот пристап кон повторното отворање доведе до цунами од инфекции што ја зафати целата нација, пренесува Њу Јорк Тајмс.
Соочени со непредвидлива и неконтролирана епидемија и финансиска несигурност, луѓето и компаниите трошат претпазливо, што сугерира дека патот до закрепнување ќе биде нерамномерен и болен.
Кина, исто така, се соочува со пошироки предизвици и надвор од нејзините граници, бидејќи глобалната економија забавува, влечена од високата инфлација, енергетската криза и геополитичките превирања.
Активноста на фабриките во Кина се намали во декември, бидејќи брзото ширење на инфекции ги приземји работниците, ги подјаде испораките и ја намали побарувачката, според владиното истражување на производителите. За услужните индустрии како рестораните, бизнисот беше речиси исто толку лош како на почетокот на 2020 година, за време локдаунот, речиси на национално ниво, што следеше по првата појава на Ковид во градот Вухан.
„Епидемијата имаше големо влијание врз производството и побарувачката на претпријатијата, присуството на персонал и логистиката и дистрибуцијата“, се вели во соопштението на Националното биро за статистика.
Подготви: Д. Мишев