Министерството за надворешни работи на Украина најостро ја осудува срамната „пресуда“ изречена денеска на првиот заменик-шеф на Меџлисот на кримските Татари, Нариман Џељал како и на браќата Асан и Азиз Ахтемов од страна на окупаторската администрација на привремено окупираниот Крим, информираат од МНР на Украина.
Нариман Џељал е осуден на 17 години затвор со парична казна од 700 илјади рубли ( околу11700 евра). Асан Ахтемов е осуден на 15 години затвор со парична казна од 500 илјади рубли ( околу 8300 евра). Азиз Ахтемов е осуден на 13 години затвор со парична казна од 500 илјади рубли.
Нариман Џељал беше приведен на 4 септември 2021 година, веднаш по враќањето на Крим од Киев, каде што учествуваше на инаугуративниот самит на Меѓународната платформа за Крим. Неговото притворање стана уште еден обид да се скрши духот на отпорот кон окупацијата на полуостровот и цинична реакција на воспоставувањето нов формат на меѓународна соработка за деокупација на Кримскиот Полуостров. Оттогаш, Нариман Џељал и браќата Асан и Азиз Ахтемов го поминаа целиот арсенал на руски репресивни методи на притисок: од заплашување и закани до физичка тортура.
Од МНР на Украина истакнуваат денешната срамна казна беше уште едно сведоштво за политички мотивираниот прогон од страна на руските власти врз претставниците на кримските Татари, кои беа заложници на криминалниот режим на Путин поради нивното несогласување со окупацијата на Крим.
Од почетокот на целосната инвазија на Русија на Украина, криминалната окупаторска сила изрече повеќе од 30 казни за кримските политички затвореници, чиј вкупен затвор е веќе повеќе од 1.100 години. Кремљ продолжува дрско да ги прогонува и игнорира своите меѓународни обврски за почитување и обезбедување на човековите права и основни слободи, грубо кршејќи го меѓународното хуманитарно право.
Од украинското МНР ја повикуваат меѓународната заедница и партнерите во Меѓународната платформа за Крим да извршат политички, дипломатски санкции и економски притисок врз Русија со цел веднаш да се ослободат Нариман Џељал, браќата Асан и Азиз Ахтемов и сите украински граѓани незаконски затворени од режимот на Путин.
Заедно се приближуваме до денот кога зборовите на Нариман Џељал од зад решетки ќе станат реалност: „Сè започна со Крим и ќе заврши со Крим“.
Подготви: Д,Мишев
