Високиот претставник на ЕУ за надворешна политика и безбедност, Жозеп Борел утринава се огласи по разорниот земјотрес што денеска ги погоди Туркије и Сирија и однесе голем број животи и најави помош од ЕУ.
„Нашите мисли се со народот на Туркије и Сирија. ЕУ е подготвена да помогне“, напиша Борел на Твитер.
Devastating earthquake rocked Türkiye and Syria this morning, claiming the lives of hundreds of people and injuring many more.
Our thoughts are with the people of Türkiye and Syria. The EU is ready to help.
— Josep Borrell Fontelles (@JosepBorrellF) February 6, 2023
Холандскиот премиер Марк Руте најави дека холандски тим за потрага и спасување ќе се приклучи во потрагата по преживеани во Туркије и во Сирија. Тој преку објава на Твитер му изрази сочувство на турскиот претседател Реџеп Таип Ердоган.
Грчкиот премиер Кирјакос Мицотакис изјави дека и Грција „ќе ги мобилизира своите ресурси и веднаш ќе им помогне на погодените области“, а помош вети и Шведска.
Рускиот претседател Владимир Путин денеска изјави дека Москва е подготвена да и ја пружи сета потребна помош на Анкара по силниот земјотрес што предизвика бројни жртви.
Турската Агенција за управување со катастрофи и вонредни состојби (АФАД) претходно ја повика меѓународната заедница да помогне во напорите за пребарување и спасување.