“Улогата на медиумите во развојот на јавниот имиџ на укажувачите (свиркачите)” беше тема на дискусијата и краткото предавање организирано од Здружението на новинари на Македонија, во соработка со Амбасадата на САД во Македонија. Настанот започна со обраќање на претседателот на ЗНМ, Насер Селмани, кој објасни дека немале голема можност да се бават со прашањето за укажувачите, бидејќи досега се бореле за поголема безбедност на новинарите во Македонија.
“Безбедноста на новинарите во Македонија е загрозена, а институциите не само што не ги казнуваат насилниците, туку стануваат и соучесници на насилството против новинари. Минатата недела двајца наши колеги беа притворени од полицијата. Жалам што и покрај промената на власта во Македонија, полицијата има сличен однос со новинарите, како и претходната власт. Неприфатливо е новинарите да се третираат од страна на полицијата како криминалци. Новата влада мора да разбере дека новинарството не е криминал.” – изјави Селмани.
Иако во Република Македонија законот за укажувачи стапи на сила во 2016 година, Селмани изјави дека тој закон за жал не е во согласност со меѓународните стандарди.
“И така лош како што е, тој речиси и не се спроведува, затоа што системот се плаши од транспарентност и оттчетност. Има клучни слабости на законот, начинот на пријавување на криминалот и казнување на лицата што ќе го откријат идентитетот на укажувачите. Кај нас укажувачите наводите за криминал прво треба да ги пријават во институцијата каде работат, до јавното обвинителство и полицијата, а ако тие не преземат ништо, тогаш имаат право тие наводи да ги презентираат во јавноста. Во светот е обратно, укажувачите имаат право директно да ги пријавуваат злоупотребите во јавноста. Вториот пропуст е што казните за лицата што ќе откријат идентитет на укажувач се многу ниски и практично укажувачите со вакви ниски казни се незаштитени. “
По обраќањето на претседателот на ЗНМ, со кратко предавање излезе и долгогодишниот меѓународен експерт во областа на Законите за заштита на свиркачите, Том Девајн, на кое главна цел беше важноста на безбедност, нвинаризаштита на укажувачите од страна на законите, и ги сподели своите искуства од САД.
Ангела Петровска
фотографија: МИА
