ВЕСТ НА ДЕНОТ: „За“ и „против“ онлајн работата на Собранието
По трите потврдени случаи на пратеници активни на вирусот Ковид-19, се интензивираа дебатите околу можноста за заседавање на Собранието преку онлајн апликации. Владејачкото мнозинство предлага промена на Деловникот за да се овозможи работа на далечина за пратениците кои имаат решение за изолација, додека ВМРО-ДПМНЕ смета дека од уставно-правен аспект Собранието не може да работи и да одлучува преку онлајн апликации.
Прашањето за онлајн работа на пратениците се актуелизира вчера откако пратеничката група на ВМРО-ДПМНЕ потврди дека пратеничка од редовите на оваа партија е позитивна на Ковид-19. Таа била позитивна на вирусот пред повеќе од една недела, а две недели претходно не доаѓала на работа во Собранието.
Претходните денови беше објавено дека позитивни на тестот за Ковид-19 биле и пратениците Лазе Танески од СДСМ и Исмаил Јахоски од ДУИ. Таневски се тестирал бидејќи сакал да патува во странство, а Јахоски имал симптоми на Ковид-19 и беше хоспитализиран.
ЦИВИЛНИ АКТИВНОСТИ
Анкета: Младите нема да бегаат во Европа ако се применуваат европските вредности
ЦИВИЛ со конференција „Зелените доаѓаат“
Конференцијата „Зелените доаѓаат 2020“ во организација на ЗЕЛЕН ЦИВИЛ (организациска единица на ЦИВИЛ) во партнерство со Фондацијата Хајнрих Бел, ќе се одржи во среда, на 21 октомври во хотел „Порта“ (Аеродром) со почеток во 12 часот.
Конференцијата има цел да ги промовира зелените вредности кои ги вклучуваат социјалната правда и антинационализмот како неделиви области на дејствување и креирање политики и практики.
Учеството на конференцијата е возможно единствено преку најава, со оглед на просторните ограничувања, соодветно на мерките за заштита од коронавирусот. Следење на конференцијата во живо ќе биде обезбедено преку видео линк на Фејсбук страницата ЗЕЛЕН ЦИВИЛ.
„Европа е наш дом“ во Тетово, Гостивар и Кичево
ФЛЕШ ВЕСТИ
Првата македонска компанија лиценцирана за одгледување канабис за медицински цели „НЈСК Холдинг“ денеска го отвори производствениот капацитет за кој инвестираше над 16 милиони евра.
Заев најавува приватизација на Македонски Пошти, и иницирање на истата идеја за ТЕЦ „Неготино“, „Македонски Железници – Транспорт“, „Еврокомпзит“…
Со 52 гласа „за“, 17 „против“ и ниту еден воздржан, Собранието вечерва го донесе Закон за задолжување на Република Северна Македонија со заем кај Меѓународната банка за обнова и развој – Светска банка по Договорот за заем за финансирање на Проектот за итно справување со Ковид-19.
Владата на вчерашната седница ја разгледа и усвои Информацијата за потребата од објавување на имињата и надоместоците на советниците и соработниците на членовите и на претседателот на Владата.
Владата на вчерашната седница ја разгледа информацијата за одржаниот четиринаесетти состанок на Поткомитетот за правда и внатрешни работи помеѓу Република Северна Македонија и Европската Унија во рамките на Комитетот за стабилизација и асоцијација.
Владата на вчерашната седница ги разгледа препораките на Комисијата за заразни болести за задолжително носење заштитни маски на отворено и за забрана за групирање во домови на семејни прослави и на повеќе од четири лица на јавен простор по 22 часот, при што заклучи дека за нивно спроведување ќе бидат неопходни измени во Законот за заштита на населението од заразни болести.
Шар Планина не смее да биде заштитена само на хартија, апелираат граѓанските организации.
Преку Европската Унија нашата земја добива брз пристап до лекот за третман на ковид-19 „Ремдесивир“, информира Владата.
СЛОБОДНА ЗОНА
„Повторно една неверојатна дилема во Собранието: во услови на светска пандемија, кога десетици парламенти во светот, меѓу кои и во најстарите демократии, поминаа на можноста работата на пратениците да може да се одвива и со онлајн присуство на седниците на пратениците на собраниските или комисиските расправи, кај нас се отвора бескрајна расправа дали за да се примени тоа практично, иако приинудно технолошко решение, треба да се менува и Уставот на државата?!“, пишува Сашо Орданоски во колумната „Инаетот не е политичка стратегија“.
А. П.
