ВЕСТ НА ДЕНОТ: ЦИВИЛ на панел дискусија во Гевгелија „Попис: Статистика, не политика“
ЦИВИЛ одржа панел дискусија на тема „Попис: Статистика, не политика“ во Гевгелија. Градоначалникот Сашко Поцков, членот на советот на општината, Ристо Камов, од редовите на Социјалистичка партија и претседателката на пописната комисија за реон 11, Ката Ристова говореа за значењето на пописот за развојот на општината, подготовките и начините за спроведување на пописот во реонот 11, како и за политизацијата на оваа статистичка операција.
Иако беа поканети, претставниците на ВМРО-ДПМНЕ во општинскиот совет, не најдоа време за учество. Сепак, опозицијата беше претставена преку советникот од Социјалистичка партија, а организаторите ги претставија ставовите на опозицијата и преку видео снимки. Говорниците беа едногласни во ставот дека попис е потребен за спроведување на развојните политики и стратегии за Гевгелија, која своевремено беше една од најбогатите општини во некогашната југословенска федерација.
ИЗЈАВА НА ДЕНОТ: Филипче: Директорот на болницата во Струга, Мухамед Асани, ќе биде разрешен поради случајот со родилката Веапоска
Министерот за здравство, Венко Филипче денеска соопшти дека директорот на болницата во Струга, Мухамед Асани ќе биде разрешен поради случајот со родилката Јалдз Веапоска, на која по породувањето и беа извадени три органи.
„Донесена е одлука да се разреши директорот на струшката болница и во текот на денешниот или на утрешниот ден ќе биде назначен нов директор. Во тек се сите други постапки во однос на активностите и на другите институции кои беа вклучени во овој случај“, изјави Филипче.
ФЛЕШ ВЕСТИ
АПЕТИТ Рамиз Мерко од општинскиот буџет потрошил фантастични 27.500 евра во 2020 година за репрезентации, односно за јадење по ресторани. Во изминатите три години, односно за 2018-2020 потрошени се речиси 78 илјади евра од програмата „Градоначалник – за расходи и репрезентација“.
ПРАВДА „Доколку ниту еден орган не преземе дејствија за расчистување на сомнежите за набавката на софтвер поврзан со Драги Рашковски, ние веројатно ќе отвориме предмет“, вели шефицата на Обвинителството за гонење на организиран криминал и висока корупција, Вилма Русковска за „Слободен печат“.
ПОПИС Дерала во Утрински брифинг: Ја повикувам опозицијата на локално ниво да не се двоуми да разговара за пописот.
ГРАЃАНСКО ОПШТЕСТВО ЦИВИЛ е во потрага по соработници и волонтери за организацијата, како и за медиумската платформа. Се разбира, предност имаат активните поддржувачи и членови на организацијата кои деновиве ќе добијат насоки за аплицирање и за ажурирање на нивното членство.
КОВИД-19 Освен веќе воведениот полициски час, нови рестрикции засега нема да има.
Сто и шестнаесет случаи на реинфекција се регистрирани во земјава заклучно со вчерашните податоци, од кои двајца се починати. Ова се должи пред се на непочитување на мерките, особено на оние лица кои веќе го прележале вирусот и кои сметаат дека повторно не можат да заболат, смета Караџовски.
РЕФОРМИ Подобрување на фискалниот капацитет и зголемување на приходите на општините, зголемување на фискалната дисциплина, како и на транспарентоста и отчетноста во нивната работа – ова се трите столба од реформата за унапредување на фискалната децентрализација, процес кој го спроведува Министерството за финансии.
Во Собранието уште има закони од четвртиот пакет, опозицијата да не блокира, туку да нуди решенија.
ДИПЛОМАТИЈА Министерот за надворешни работи, Бујар Османи, во рамки на работната посета на Швајцарската Конфедерација оствари средба со Игнацио Касис каде во фокусот на разговорите беше збогатување на билатералните односи, преку интензивирање на договорната состојба, економската соработка, состојбите поврзани со КОВИД-19 пандемијата, актуелни прашања од доменот на меѓународната и регионалната политика, како и соработката во бројните мулатилатерални организации.
ВАКЦИНИ Амбасадорот на Европската Унија во Северна Македонија Дејвид Гир од Тетово порача дека доставата на вакцините не е на посакувано ниво, но смета дека механизмот Ковакс ќе профункционира соодветно. Тој образложи дека ЕУ посакува да се обезбедат вакцините од самиот почеток, но потенцира дека работата е уште потешка поради постојаното зголемување на бројот на заразени.
ПОПИСОТ И РАЗВОЈОТ „Резултатите од Пописот ни требаат за да имаме основа за донесување на развојни политики засновани врз прецизни податоци кои повторно, ќе бидат од директна полза на граѓаните, од полза на нашата дијаспора“, истакна Османи за време на работната посета на Швајцарската Конфедерација на средби со повеќе наши граѓани.
СЛОБОДНА ЗОНА
„Ете, така, полека но сигурно, Македонија останува една од ретките земји во Европа (а веројатно и во светот) во која ретроградните политички формации во редовите на ВМРО-ДПМНЕ ја блокираат општествената стварност, бидејќи продолжуваат да ја гледаат со очилата на некои изминати векови – не само во идеолошка (за што секојдневно си се расправаме), туку и во технолошка смисла. Заради таквата „дигитална примитивност“, во услови на пандемија, овој состав на Собранието не е во состојба да си ја врши својата клучна демократска работа – да предлага, да расправа и да усвојува закони неопходни за, колку-толку, нормално функционирање на општеството. “ пишува Сашо Орданоски во колумната „Скандалите се моќна алатка – визијата е закон!“
„Создавањето на општа ѓурултија од плуканици, навреди, лаги, насилство и омраза, во која е тешко се препознава кој е добар а кој лош, кој вреди а кој не вреди, е одлична магла. А во маглата, се знае, ловат волците, а страдаат – овците.
Да не должам со опис на симптомите на проблемот и болеста што ја гледате, знаете и чувствувате секој ден. За да не биде ова уште една празна ламентација над позната хронична состојба, Младиќот и кристалната топка, како и секој пат, ќе ви понудат и чаре и лек, а како рекле старите, добрите лекови не чинат ни пет пари.“ пишува Петрит Сарачини во колумната „Ако плукате и ги „стрелате“ најдобрите, кој ќе го изнесе општеството од рововите и плукачката војна?“
„Метафората е „културен багаж“, што се однесува на ставови или очекувања „спакувани“ во нашите домашни култури што ги носиме со нас. Овие скриени содржини можат да влијаат на меѓукултурните средби, да ја прикажеме сликата на нашата земја каде и да патуваме, со цел да се придонесе во привлечноста на туристите, затоа што Република Северна Македонија е позната по мултикултурализмот. Поради тоа што едно заедничко за сите нас е турскиот чај кој се спрема со векови, а можеме да го најдеме во старата скопска чаршија. Во летниот период се чудиме дури и ние самите како може да седнат група странци во чајџилница и да го пијат тој чај, а ние да го оставиме на страна поради несогласувањата за ништо! Или на некој ќе му пречи јазикот на другиот, а скоро сите носиме иста облека, за разлика од другите во светските метрополи, кои се шетаат по улиците со носиите од нивните краеви од каде се дојдени.“ пишува Сафит Зеќири во колумната „Носење незабележан „културен багаж“
“Национализмот, шовинизмот, расизмот е секаде околу нас, се раѓа одново, се негува, слави, протиња прво како голем бизнис на Мастер фашистите, големите скриени фирери, кои под капата на човековите слободи и права ги хранат и плаќаат оние бараби што тоа најголемо зло и опасност по нашите деца и животи јавно го манифестираат и слават. Целта е сè што е страно, различно, нееднакво, да се прогласи за причина за сите неволји, неуспеси, несреќи, омрази и војни и со нова света и „патриотска“ војна да се грабне власта“, пишува Перо Арсовски во денешната колумна „Борбата против фашистите е вечна“.
И. Крџиќ
