Министерот за информатичко општество и администрација Дамјан Манчевски денеска оствари работна средба со претставници од граѓанските организации, експерти, претставници од меѓународната заедница и од здруженија и асоцијации на медиуми.
Како прв говорник, генералниот секретар на Владата, Драги Рашковски, истакна дека недостасува дијалог и личен контакт на вработените со раководните лица, зашто досега комуникацијата со генералниот секретар се одвивала преку три лица. На тој начин, дури и вработените да имале идеи што би ја подобриле работата на Генералниот секретаријат, нетранспарентноста довела тие да не се остварат.
Министерот Манчевски вети дека оваа средба е една од многуте што следуваат, дека се отворени за соработка и имаат слух за предлозите за подобрување на работата на администрацијата, а со тоа и на Министерството.
Потребата од итни реформи во администрацијата, според Манчевски, произлегува од превработеноста и од недостатокот од стручен кадар. На новинарско прашање – дали Владата спровела нови вработувања во првите денови од своето работење, Манчевски одговори дека освен вработувањата во кабинетите на министрите што законски следуваат, други вработувања не се спроведени.
Претставниците на граѓанските организации и синдикатите излегоа со многу предлози за реформи во администрацијата, меѓу кои: флексибилно работно време, подобрување на Законот за јавни службеници, како и предлог-стратегијата за реформирање на администрацијата да опфаќа дел кој нема да ги става на маргините лицата со попреченост и другите ранливи категории на граѓани кои не можат да си ги остварат своите права, токму поради стереотипите кон нив.
Министерот Манчевски ја истакна потребата од соработка со граѓанските организации, со цел навреме да се имлементираат планираните активности на Министерството, за што ќе се воспостави Консултативен совет за имплементација на клучните реформски приоритети.
Биљана Јордановска