Додека секој ден се протестира во одбрана на името, секој со своите претензии, и во Македонија и во Грција, политичкиот процес за верификување на договорот за името од грчка страна и датум за почеток на преговорите за ЕУ и НАТО, ќе се одвива во наредните две недели.
Талат Џафери изјави дека очекува, откако Законот за ратификација на Договорот со Грција помина во Собранието, сите институции, како и претседателот Иванов да го почитуваат уставот и парламентарната демократија, а имплементацијата на Договорот ќе зависи од референдумот на кој ќе одлучуваат граѓаните, чија волја до крај ќе се испочитува.
Бујар Османи во интервју за Би-би-си изјави дека овој Договор би ги подобрил меѓуетничките односи, со оглед дека во време на избори секогаш има поделби меѓу Македонците и Албанците. Според Османи ако пропадне Референдумот ќе пропадне и можноста за влез во ЕУ и НАТО.
Федерика Могерини, Високата претставничка за надворешни работи на ЕУ, ги повика земјите членки на ЕУ да ја наградат Македонија за напредокот и да одредат датум за преговори во пресрет на утрешната средба на министрите за надворешни работи на ЕУ каде треба да се дебатира за проширувањето и за априлските извештаи на Европската Комисија за Западниот Балкан.
Што се однесува до покана за членство во НАТО, Јенс Столтенберг, генералниот секретар на НАТО, изјави дека доколку пропадне референдумот не постои начин Македонија да биде дел од Алијансата. Единствена можност е позитивен исход од референдумот, потенцираше Столтенберг.
За внатрешните конфликти и во двете земји, шефот на грчката дипломатија Никос Коѕијас објасни дека сега веќе постои една друга линија за поделба во двете земји, а тоа е поделбата на оние што се за и на оние кои што се против решение.
Што се однесува на протестите, кои веќе имаат одреден и предвидлив тек, со мали инциденти и превирања, поминуваат мирно и со истите пораки дека „името не го даваме“. На грчка страна, вчерашниот протест во Солун помина со помал инцидент кога помала група маскирани лица, ги нападнала полициските сили со дрва и камења, а полицајците одговориле со солзавец.
И да не бидат заборавени судските рочишта, денеска се одржа уште едно рочиште за „Монструм“. Она што досега е конечно во случајот е одлуката на Врховниот суд во декември 2017 кога ги укина пресудите, ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири, и им определи мерки на претпазливост. За судот се уште недостапни се Алил Демири и Африм Исмаиловиќ по кои се распишани меѓународни потерници.
Биљана Јордановска
