Илјадници демонстранти синоќа ги блокираа патиштата во Ерусалим, Тел Авив и околу Израел во знак на протест, откако Парламентот усвои закон со кој се ограничува способноста на Врховниот суд да ги поништи одлуките донесени од владините министри. Некои демонстранти извикуваа „Срамота“, додека полицијата пукаше со водени топови врз нив.
Како што пренесува Њу Јорк Тајмс, израелскиот премиер Бенјамин Нетанјаху во синоќешното телевизиско обраќање се обиде да ги смири засилените немири, сугерирајќи дека до крајот на ноември ќе поднесе поширок план за ремонт на судството што ќе го преземе неговата влада.
Националистичката десница во земјата го прослави усвојувањето на законот, кој стана основа за подлабоки јазови во Израел меѓу оние кои сакаат посекуларна и плуралистичка држава и оние со порелигиозна и националистичка визија. „Со Божја помош, ова ќе биде само почеток“, им рече на новинарите ултранационалистичкиот министер Итамар Бен-Гвир.
Јаир Лапид, центристичкиот лидер на опозицијата, рече дека Нетанјаху е во канџите на тврдокорните членови на неговата коалиција.
„Оваа екстремистичка и месијанска влада не може да ја распарчи нашата демократија на пладне, а вечерта да го испрати Нетанјаху да каже дека нуди преговори“, рече тој. „Нема да се откажеме. Борбата штотуку започна“.
Пред неговото обвинение во 2019 година, Нетанјаху беше познат како цврст бранител на независниот Врховен суд, рече Изабел Кершнер, дописник на Тајмс од Ерусалим.
„Дури и да сакаше да помине овој закон, не е јасно дека сакаше да помине вака, во неговата најекстремна форма. И кога тој вели дека ќе продолжи само со остатокот од планот за ремонт во рамките на широк консензус, неговите многубројни противници едноставно повеќе не му веруваат“.
Новиот закон ја ограничува употребата на израелскиот Врховен суд на правниот концепт на „разумност“ за да ги спротивстави одлуките на министрите. Опозициските лидери рекоа дека ќе побараат од Врховниот суд да се произнесе за законитоста на новиот закон, што ќе предизвика потенцијална криза меѓу гранките на власта во земјата.
Пратениците ја усвоија мерката, 64-0, вчераутро, откако опозиционерите излегоа од салата во знак на протест поради гласањето.
Сојуз од 150 големи бизниси, вклучувајќи ги и најголемите трговски центри во земјата, ги затворија вратите пред да започне гласањето. Повеќе од 10.000 воени резервисти се закануваат со отказ од должноста, а здравствените работници денеска најавија штрајк.
Подготви: Д. Мишев
