Познатиот македонски дизајнер Ненад Секирарски кој веќе шест години работи на островот Бали, во интервју за ЦИВИЛ Медиа раскажа раскажа за неговата потреба да ја истражи професионалната граница, за различностите на жителите на Бали, инспирацијата која ја црпи од нивниот стил на живеење и облекување. Тој е познат по женските елегантни фустани, но сега дизајнира и машка и детска колекција. На Бали рамноправноста вели е изразена до тој степен што и жените работат како ѕидари. Не му робуваат на материјалното, интровертни се и си го гледаат својот живот. Просечната плата од 300 евра половина ја трошат, а половина ја заштедуваат.
Потребата да се истражувам себе си, да ја истражувам својата професионална граница. Поканата од КТЗ, позната лондонска модна куќа, да работам на развој на нивната колекција дојде во вистинско време. Локацијата беше случајна, тие тука работеа веќе со години. Јас дојдов и станав дел од тимот.
Самиот живот тука е прилично меѓународен. Луѓето што живеат овде доаѓаат од различни култури и влијанија. Ретко работам со луѓе од Бали. Нивниот живот е прилично повлечен. Тие се припадници на хинду религијата, значи е прилично интровертна иако работат со странци имаат потреба својот живот да го држат за себе. Скромни се и немаат потреба за материјални нешта, вели Секирарски.
Самите Балежани се прилично традиционални и имаат прилика за свечени прилики да се облекуват во традиционална облека. За жените тоа најчесто е сараоки чипка, за мажите сараоки кошула. Тоа го носат и за свадби и други случувања, понекогаш дури и на работа се облечени во традиционални облеки.
Главните церемонии за кои вложуваат пари се венчавката и смртта (раѓањето во новиот живот) бидејќи тие веруваат во задгробен живот. Мојата работа тука е развој на производи за различни брендови. Пристапувам во момент кога некој има некаква идеја, но не знае точно како да ја реализира. Со самото мое искуство подеднакво како во шаблони така и во дизајнот помагам нештата да добијат реален изглед и да бидат конкурентни на пазарот. Предизвикот да работам за КТЗ на машка мода и тоа улична мода, во голема мера ми помогна да се осознаат себе си во тој аспект, и да работам со клиенти кои имаат поширока палета на производи. Ако претходно бев дизајнер на женска елегантна облека, сега тоа е проширено и во делот на машката облека и во делот на детската облека, посочи Секирарски.
Глобалната економска криза се чувствува и на Бали, според Секирарски, кој вели дека таму животните трошоци се мали, и покрај малите приходи.
Просечна плата тука е 300 евра. Но, трошоците за живот се многу поевтини. Со половина плата може да се изнајми соба за живот , да се платат режиските трошоци, храна, остатокот можат да останат за некаква заштеда. Нормално, со почетокот на пандемијата островот беше затворен немаше туристи. Последните 6 месеци се чувствува големо влијание од туристи и домашни и странски, Австралија е блиску.
Што се однесува до инфлацијата, се чувствува како и секаде во светот. Индонезија е земја која има сопствен гас и нафта, цените на пазарот се зголемуваат па и тука тоа влијае. Мора некои работа поскромно или со ум да се прават, вели.
Во однос на безбедноста, дискриминацијата и човековите права на Бали, Секирарски вели дека дискриминацијата е на најниско ниво, земјата е безбедна, а човековите права се почитуваат.
Што се однесува до некаков тип на дискриминација, баш и нема. Лесно може да се сретне секаков профил на луѓе, луѓето имаат потреба да си го гледаат својот живот и својата работа.
Полиција баш и не може да се види на секој чекор, но ако има потреба секогаш се тука. Безбеден е животот тука. Заради климата сите се надвор, во кафичите, на планина, на плажа и сето тоа олеснува да има поголема гужва. Населението е 4,5 милиони и за викенд особено се чувствува.
Сите имаат право на образование на здравствена заштита, болниците се одлично опремени, што се покажа со пандемијата, одлично се снајдоа. Сите моравме да примиме вакцини. Имаше јака контрола ако некој е заболен да се среди тоа на најбезболен начин.
На сите работни места можат да се видат и мажи и жени. Можат да се видат работници на улица, ѕидари и мажи и жени.
Разговорот го водеше Александра Велинова
Монтажа: Ариан Мехмети