Украинскиот претседател, Володимир Зеленски, ги изложи деталите за неговиот долгоочекуван „План за победа“ во говорот пред парламентот во кој го призна зголемениот притисок од сојузниците за преговори за крај на конфликтот.
Голем дел од предлогот се потпира на странска поддршка во оружј, и исклучува отстапување територија на Русија, додека „безусловната покана“ Украина да се приклучи на НАТО е сржта на Планот што тој претходно го претстави на средбите во Вашингтон и на турнеја низ европските престолнини пред да го претстави јавно пред Врховната Рада во Кијив во средата.
Што содржи планот за победа?
Предлогот се состои од пет точки: покана за членство во НАТО, одбранбен аспект, одвраќање на руската агресија, економски раст и соработка и повоена безбедносна архитектура.
Според Кијив Индипендент, Планот вклучува и три тајни додатоци кои се споделени со меѓународните партнери. Дејвид Арахамиа, парламентарниот водач на владејачката партија, рече дека доверливите делови ќе им бидат претставени на водачите на фракциите.
„Доколку планот биде поддржан, можеме да ја завршиме војната најдоцна до следната година“, рече Зеленски во парламентот во присуство на врховниот командант Олександар Сирскиј, началникот на военото разузнавање Кирило Буданов и западни дипломати.
„Планот за победа на Украина е план за зајакнување на нашата држава и нашата позиција. Да бидеме доволно силни за да ја завршиме војната. Да се осигураме дека Украина ги има сите свои мускули“, рече Зеленски. Овој план може да се спроведе. Тоа зависи од нашите партнери. Нагласувам: од партнерите. Дефинитивно не зависи од Русија.
Поканата на Украина за членство во НАТО беше ставена на врвот на листата. Кијив ја поднесе својата апликација за приклучување во септември 2022 година, но допрва треба да добие јасен сигнал од сојузниците.
„Ние разбираме дека членството во НАТО е работа за иднината, а не за сегашноста“, рече Зеленски, но додаде дека поканата понудена веднаш ќе ја покаже грешката на рускиот претседател Владимир Путин во „неговите геополитички пресметки“.
„Ние сме демократска нација која докажа дека може да го заштити нашиот заеднички начин на живот.
Вториот член ја нагласува потребата да се донесе војната на руска територија, како на пример за време на прекуграничниот упад во Курск, започнат на почетокот на август. Со тоа ќе се спречи создавање на можни „тампон зони“ на украинска територија.
Оваа точка, исто така, повикува на укинување на ограничувањата за удари со долг дострел во Русија, дополнителни набавки на капацитети со долг дострел и западна поддршка во соборувањето на руски ракети и беспилотни летала над Украина.
Дополнителна поддршка во изградбата на украинските копнени сили, противвоздушна одбрана, инвестиции во одбраната, разузнавачка помош и друга воена помош ќе помогне да се зајакне Украина и да се одврати руското население од нивната „идеологија на војна“, рече претседателот.
Третата точка се однесува на ненуклеарното одвраќање, од кое еден дел ќе остане класифициран. Украина предлага „сеопфатен ненуклеарен стратешки пакет за одвраќање на нејзина територија“ кој ќе ја заштити земјата од идна агресија.
Оваа точка е детална за лидерите на САД, Обединетото Кралство, Германија, Франција и Италија.
Четвртиот дел се однесува на употребата на Украина на нејзините природни ресурси, како што се ураниум, титаниум и литиум, кои претставуваат потенцијал за економски раст за Киев и ЕУ. Украина нуди посебен договор за заеднички инвестиции и користење на овие ресурси со ЕУ и САД.
Делот дополнително повикува на засилување на меѓународните санкции против Русија за да ја поткопа нејзината способност да ја одржи својата агресија.
Овој четврти дел, исто така, содржи доверлив дел што беше споделен со западните партнери.
Петтиот дел се однесува на повоената безбедносна архитектура на Украина. Зеленски рече дека Киев може да се пофали со голема и искусна воена сила која може да го зајакне НАТО и безбедноста на европскиот континент.
„Ако партнерите се согласат, тогаш по војната, предвидуваме замена на одредени американски воени контингенти стационирани во Европа со украински единици“, рече претседателот.
„Ако Путин ги постигне своите налудничави геополитички, воени, идеолошки и економски цели, тоа ќе создаде огромен впечаток за другите потенцијални агресори, особено во регионот на Персискиот Залив, регионот на Индо-Пацификот и Африка, дека агресивните војни можат да бидат профитабилни за и нив“, им рече претседателот на пратениците.
Зеленски истакна дека „коалицијата на криминалци“ на Путин сега ја вклучува и Северна Кореја, која обезбедува не само оружје, туку и персонал за руските фабрики и војската.
„Ова е практично учество на втора држава во војната против Украина на страната на Русија. Претседателот, исто така, ја истакна поддршката што ја даваат Иран и Кина.
„Мораме да го спроведеме победничкиот план за да ја принудиме Русија да биде на мировниот самит и подготвена да стави крај на војната.
Планот за победа во македонските медиуми
Поголемиот дел од македонските медиуми го проследија планот за победа на Зеленски низ призмата на Русија, државата агресор. Така, многу помалку може да се дознае за тоа што точно содржи планот за победа, додека доминираат наслови кои потенцираат дека Москва го отфрлила планот на Зеленски, поткрепено со изјавите од портпаролот на Кремљ, Дмитриј Песков и портпаролката на руското МНР, Захариева.
Секако, најголем простор му се остава на „главниот заемодавач на земјава“, и најголем поддржувач на Путин од земјите членки на ЕУ, унгарскиот премиер Виктор Орбан кој, не е никакво чудо, го отфрла планот прогласувајќи го за „застрашувачки“.
И како „шлаг на тортата“ ви претставуваме пример за професионално и објективно новинарство преку насловот на еден портал, неколку пати претходно посочен од Мониторинг тимот на Цивил како дистрибутер на руската пропаганда во Северна Македонија, кој не се задоволил што ќе ги пренесе ставовите на државата агресор, туку го дофилувал насловот, кој „збогатен“ со уличен жаргон гласи: АЛО, ЗЕЛЕНСКИ, РАЗБУДИ СЕ Русија го отфрли украинскиот „План за победа“.
Драган Мишев
