Со отворено обраќање до мандатарот Зоран Заев, повеќе синдикални здруженија се изјаснија проитв поставување на вицепремиер од бизнис заедницата.
Како што стои во Повелбата за солидарност на синдикатите и сите пријатели на работниците во Македонија, најавите во јавноста за избор на вицепремиер од бизнис зедницата, може да ја остави Македонија во истата состојба со општествен систем во кој успеваат само моќните и богатите, а лошата состојба на работничките права, образованието, како и проблемот со корупцијата само да се продлабочат.
„Заради таквиот систем, во времето на Никола Груевски, Македонија стана рекордер во Европа по сиромаштија, социјална раслоеност и смртност на работници, а стапките на економски раст беа пониски отколку за времето на претходните две влади. Нужно е да сфатиме дека за да може Македонија конечно да тргне по вистинскиот пат на развојот, мора да има промена во економските политики, но не во насока на уште поголемо фаворизирање на бизнисот, туку во спротивна насока, во насока на градење на поинклузивно општество“, стои во Повелбата на синдикатите.
Синдикатите, потписници на Повелбата, укажуваат и на потребата од одделување на Владата од бизнис заедницата поради различните интереси што може да придонесе до меѓусебни спротивставувања.
„Владата и бизнис заедницата имаат различни интереси, кои понекогаш и се преклопуваат, ама во поголем дел од времето се спротивни едни на други. Заради тоа, Владата и бизнис заедницата се одвоени, исто како што се одвоени државата и црквата. Меѓу нив треба да постои соработка, ама таа соработка е на ниво на трипартитен дијалог, канализиран преку Економско-социјалниот совет, во кој, покрај Владата и бизнис секторот, се вклучени и синдикатите“, се вели во Повелбата.
Потписници на Повелбата за солидарност во поддршка на оваа иницијатива се Синдикатот на македонската дипломатска служба (СМДС), Синдикатот на работниците од управата, правосудните органи и здруженијата на граѓани (УПОЗ), Самостојниот синдикат на новинарите и медиумските работници (ССНМ), Левичарското движење – Солидарност, Движењето за социјална правда – Ленка, Синдикат на културата на Република Македонија (СКРМ) и Мултиетничкиот синдикат на образование (МЕСО).
