Трајко В. може да закаже седница во гаража, со гангстерите и фашистите од редовите на неговата партија. Се разбира, до моментот кога здравите луѓе во таа партија ќе си ја вратат назад и него ќе го сместат на буниште, заедно со фирерчето и неговите зли потрчковци. Ако во меѓувреме не им се распадне партијата, онаа најбогатата во Европа.
Иванов нема што да бара заштита од Америка или од кој било друг. Таму каде што логично би требало да бара заштита, нема да ја добие. Гледајте ја Москва сега како ќе стивнува. Од молчалив фикус, тој се претвори во извор на зараза и насилство. Од причина за подбив, тој стана фигура достојна само за презир, симбол на морален распад.
Во армијата сончогледи, дали први ќе се свртат обвинителите и судиите?Или тоа ќе бидат гнидите и бацилите по медиумските империи што ги изгради криминалната клика? Или тоа ќе биде партиско-полициската номенклатура? Трката ќе биде безмилосна и гадна за гледање.
Професионалците, оние што држат до своето човечко достоинство и професионалното ниво, со години беа казнувани, деградирани и понижувани на работното место, само затоа што знаеја и сакаа да работат. Сега треба да истапат и да ја раскажат тревожната сторија за тоа како (не)живееше оваа наша земја.
Слободата допрва треба да ја освојуваме. Таа не се освојува со омраза и омаловажувања, со отровни дисквалификации, туку со аргументи и докази. Со ладни глави и подготвеност да се соочиме со сета грозотија на еден долготраен процес на бавно и подмолно цицање крв, за кој се водеше сметка да биде под радарот на меѓународните институции. Факт по факт, смирено и мудро, но и решително, со придржување кон законите и демократските стандарди – така треба да ја освојуваме слободата. Добро, со по некоја пцост кога веќе не може да издржи срцето.
Секоја секунда од погромот на Собранието за време на „црниот четврток“ е легитимирање на сето зло и криминал. Секој поединечен чекор направен таа ноќ ќе биде запаметен, но не смее да остане неказнет. Веќе кружи сторијата, со многу детали, за тоа како „учеството во толпа“ било, всушност, прецизно спроведуван план за убиство и предизвикување општо крвопролевање. Не им успеа.
Објавено во Плусинфо и во Слободен печат.
