ЉУБОМИР КОСТОВСКИ
Изјавата на градоначалникот на Скопје – Орце Геогиевски е веројатно најлошата форма на отфрлување на сопствената одговорност за лошиот воздух во градот, пред се во доменот кој е секогаш негов! Тој изјави дека биле посетени некои загадувачи и дека истите биле казнети. И толку! Па вие верувајте ако сакате – тој си постави огради меѓу себе и јавноста на наједноставен ама и најдрзок начин.
Замислете дека сте новинар во некоја пристојна земја со соодветен однос кон информирање на јавноста. И дека треба да ја известите јавноста како соодговорен во информирање на сограѓаните за такви суштински настани, особено врзани за една страшна реалност – во еден миг вашиот град е најзагаден во светот! А претходно бил втор по загаденост во Европа, што значи дека ситуацијата е од лоша полоша.
Катастрофална!
И седнувате вие како новинар на работната маса и почнувате според основната лекција во новинарството да пишувате вест за да одговорите на основните правила за известување.
1. Кој ги посетил загадувачите, по функција и по институција, бидејќи, белким таа задача ја извршувале овластени и секако стручни поединци и правни лица. Одговор на ова прашање – нема. Навистина, се споменува Државниот инспекторат за животна средина ама зошто токму тие инспектори не излезат пред јавноста и не известат пред новинарите што виделе и да дадат други битни детали.
2. Кога се случиле тие посети, дали биле најавени или изненадно извршени е второто можно прашање. Соопштението содржи одредница „претходните два дена“ (претпоставка е дека тоа било во неделата и понеделникот, но можеби уште во саботата и неделата (20 и 21 декември) кои се неработни денови. И дали постои доволен меѓупростор да се изврши надзорот во такви и толку денови со сите потребни анализи, за да се извлечат заклучоци кои несомнено би воделе кон казнување што демек се случило?
Во тие рамки е неопходно да дознаеме како е извршен изборот на оние кои ја загадуваат атмосферата во градот, по кој критериум се пошло кон таа задача и каде била „погодена целта“ а каде морале да се извинуваат за вознемирувањето? Ако имале кому во периодот кој и не бил работен а не се работи за загадувач кој не функционира нон-стоп?
3. Колкава е висината на казните за оние кои биле „погодени“? Дали казните се парични, се состојат ли во некои управно-извршни дејствија (забрана за работа, временски или трајно или до исполнување на некои задачи со нова контрола на извршувањето). Ако се казните парични, дали се тие исплатени и кон кого. Мислам дали се тие само „запишани во тефтерчето“ на некој што го држи не само во државата туку и во партијата? И кој од казнетиот може да направи траен должник …
4. Па конечно кои се тие правни субјекти кои го уништуваат здравјето на граѓаните? Дали се домашни или странски субјекти и дали се токму од градот и кој раководи со нив?
Би можеле да ги прошириме прашањата на кои не е одговорено во соопштението на градоначалникот а кое всушност не содржи ништо, просто е само една голема нула. Прв и единствен жирант на вистината која не се ни ѕирнува во тој текст (соопштение) треба да е човекот кој одвај собра 90 илјади гласачи од половина милионски град со право на глас, со сета политичка и медиумска поткрепа зад себе и стана најмалку омилениот прв човек на функцијата коаја сега ја врши.
И ајде сега да извагаме што претежнува – неодговорените прашања за загадувањето од неговото соопштение за казнетите загадувачи по сите основи на една страна (ако ги има) и неговиот кредибилитет како кандидат на друга страна?
