Премиерот на Република Албанија Еди Рама ги покани лидерите на албанските партии во Северна Македонија на неформална средба, која ќе се одржи утре. Редакцијата ЦивилМедиа разговараше по телефон со Ендри Фуга, шеф на ПР тимот на премиерот на Албанија, Еди Рама и негов советник. На Фуга му поставивме прашања за карактерот на средбата и кои се очекувањата од неа.
Во разговорот, Фуга го потврди настанот.
„Да, средба во Тирана ќе има, договорена е, но нема некој посебен план или агенда. Тоа е само една обична, неформална средба, нормална консултација”, изјави Фуга за ЦивилМедиа.
Сепак, како што дознаваме од разговорот, се подразбира дека постојат низа прашања на кои може да се разговара. Опсегот на прашањата за кои се очекува дека ќе стане збор на средбата е широк – перспективите на интегративните процеси, уставните промени во РСМ и нивната поддршка од албанските партии, тензиите меѓу Србија и Косово, ситуацијата во регионот и други теми.
Како што е познато, сите албански партии потврдија дека имаат добиено покана за учество, но од партијата Движење БЕСА изјавија дека нема да учествуваат, затоа што, како што соопштија, не можат да седнат на иста маса со Али Ахмети.
„Како движење БЕСА немаме ниту една дилема во однос на чистата намера на премиерот на Албанија, за тоа што се интересира за политичката ситуација во Република Северна Македонија. Нашата грижа како Движење е со ДУИ и Али Ахмети со неговите игри и трикови во врска со овие средби, бидејќи секогаш кога има проблеми во својата партија злоупотребува вакво нешто, затоа ние позитивно одговараме на поканата на премиерот без да сметаме дека е разумно да седнеме со ДУИ и Али Ахмет на маса“, напиша на Фејсбук Фарук Авдиу од Беса.
Министерот за надворешни работи на Северна Македонија, Бујар Османи, по повод утрешната средба на лидерите на албанските политички партии од земјава во Тирана со албанскиот премиер Еди Рама, изјави дека се работи за новогодишна средба. Тој рече дека тоа е средба на премиерот на Албанија со лидери на политички партии, чија цел има размена на мислења во однос на регионот, очекувањата во новата година и желби и пораки за подобра соработка во текот на 2023 година. И Османи, како и Фуга, потврди дека нема некоја посебно подготвена агенда за што ќе се разговара.
На средбата во вторник, на 10 јануари, во Тирана се поканети лидерите на ДУИ – Али Ахмети, на Алијансата за Албанците – Арбен Таравари, на Движењето Беса – Билал Касами, на Алтернатива – Африм Гаши и на ДПА – Мендух Тачи.
Во јануари 2017 година, додека земјата беше во длабока политичка криза, албанските партии од Северна Македонија, на средба кај премиерот на Албанија, потпишаа документ наречен „Заедничка декларација на албанските политички партии во Република Македонија“, која имаше за цел заштита на интересите на албанското население во земјата и унапредување на правата, паралелно со заложбата за зајакнување на евроатлантскиот пат на земјата.
Потпишувањето на Декларацијата го искористија политичките партии на власта во заминување, предводена од ВМРО-ДПМНЕ. Дел од националистичката кампања беше и тогашниот претседател Ѓорге Иванов кој своевремено одржа прес-конференција и побара САД, НАТО и Турција да ја отфрлат оваа Декларација бидејќи е подготвена во странска држава. Тој ја искористи ситуацијата за најде изговор да одбие да му го додели мандатот на тогашниот претседател на СДСМ, Зоран Заев, за формирање влада. Во меѓувреме, политичките тензии беа пренесени низ улиците каде симпатизерите на ВМРО протестираа против, како што ја нарекоа, „Тиранска платформа“.
Назми Абдурахмани