Советот за етика во медиумите на Македонија (СЕММ) го осуди вчерашниот инцидент во кој градоначалникот и еден советник во Општината Ново Село навредувале екипа на ТВ Вис кои известувале од следи јавната седница на Советот на Општината
„Затвореноста на институциите, организациите или функционерите не може да биде метод со кој ќе се спречува известувањето за теми и прашања од интерес на јавноста…. Од друга страна, безбедноста на новинарите мора да биде ослободена од какви било закани и притисоци, а државата, во согласност со член 10 од Европската конвенција за човекови права, е одговорна за преземање на сите активни мерки, со цел да се создаде и одржува поволна клима за слобода на изразување. Потсетуваме дека ваквата одговорност произлегува и од препораките на Комитетот на министри на Советот на Европа околу заштитата на новинарството и безбедноста на новинарите и другите медиумски актери“ се вели во реакцијата.
Советот за етика повикува на преземање неопходни мерки за расчистување на ваквите настани, особено кога новинарот е спречен да информира за теми од широк јавен интерес, каква што е расправата за одлука за референдум за отворање рудници.
И Агенцијата за аудио и аудиовизуелни медиумски услуги реагираше по повод инцидентот во Ново Село во кој медиусмак екипа била попречена да ја извршува својата професионална обврска и била изложена и на вербални напади.
„Агенцијата како и повеќепати досега, ги осудува сите форми на притисок и навреди врз новинарите и медиумските работници и повторно повикува да се почитува – како достоинството на новинарската професија, така и личното достоинство на медиумските професионалци. Воедно, Агенцијата потсетува дека обезбедувањето услови за непречено работење на медиумите е неопходен предуслов за функционирањето и развојот на едно демократско општество“, се вели во реакцијата на АВМУ.
