Од иницијативата информираат дека во Кумановско во тек е изведбата на детални геолошки истражувања за металични минерални суровини, злато, сребро, бакар и молибден.
Експлоатација на рудата за овие благородни метали, претставува еден од најголемите загадувачи на природата, реаигираат од граѓанската инцијатива „Спас за Козјачија”.
„Доколку концесијата за експлоатација на руда биде одобрена, по течението на реката Петрошница ќе се отвори огромен рудник за злато и бакар. Таквиот тип на индуструја спаѓа во Г1 – тешка и загадувачка индустрија. Рудникот ќе биде со отворен коп, а рудата ќе се обработува со т.н процес на ‘лужење’. Тоа значи дека тони и тони експлозив секојдневно ќе се активираат врз почвата во Бајловце, што ќе резултира со ширење на опасна прашина во атмосферата, која ветерот ќе ја носи во нашите домови. Уште поопасен по здравјето на луѓето е методот на екстракција на рудата во кој се користат цијанид и сулфурна киселина! Евентуална хаварија може да предизвика зголемување на бројот на сериозни заболувања на луѓето и домашните животни во околината на општините Старо Нагоричане, Куманово, Кратово, Скопје, Крива Паланка и сите останати поблиски населени места. Јаловината којашто низ годините ќе остане како отпад од рудникот, можно е да истече и да се излее во Петрошница и Пчиња, пренесувајќи ги отровите преку Вардар долж цела Македонија до вливот во Солунскиот Залив”, се вели во реакцијата на иницијативата “Спас за Козјачица”.
Активностите на иницијативата засега остануваат само во рамки на информирање на населението.
„Имаме поддршка од експерти кои ни ги потврдија сомнежите дека отварањето на ваков тип на рудници е погубно за околината. Чекаме да видиме што ќе се случи со локалната власт и локалните избори кои следуваат, за да можеме да истапиме со конкретни барања за референдум. Нашата борба е насочена кон тоа граѓаните да одлучат дали сакаат да се отворат рудници на територија на општината“, изјави за ЦИВИЛ Медиа, Драгана Стефановска од „Спас за Козјачија“.
Стефановска вели дека покрај граѓаните, ниту локалните власти не се доволно информирани за опасностите кои ги носи отворањето на рудници од ваков вид, пред сè, затоа што не постои никаква транспарентност за процесите. Таа вели дека иницијативата има за цел да им објасни на граѓаните дека добивките од нивно отворање се краткорочни а последиците се неизбежни.
„Спас за Козјачија“ освен борба за својата општина, најавува поддршка и на претстојните референдуми во Дојран и Валандово.
М. Ивановска