Глобалната економија поминува низ тешка состојба, оцени академик Таки Фити за време на годишната конференција „Година за нови можности“. Според него кризата со Ковид-19 иако била краткорочна, предизвикала најсилен пад на економската активност, а исто така и актуелната енергетска криза, што довело до состојбата економиите да се справуваат со сериозни предизвици.
„Се намалуваат прогнозите за растот на светските пазари. Со последниот извештај на ММФ, светскиот раст беше проектиран на 2,7%, наспроти 3,2% какви што беа претходните предвидување. Скоро една третина од светските економии ќе влезат во рецесија“, рече Фити.
Тој додаде дека и ЕУ и нашиот најголем трговски партнер, Германија, се соочуваат со сериозни проблеми.
„Тоа има силен импакт врз македонската економија, поради таа синхронизираност на бизнис циклусите во Европската унија со состојбите во економијата во Македонија“, кажа професорот Фити.
Според него, ако домашните фирми обезбедат квалитет странските компании ќе бидат заинтересирани за вложување.
-Веќе се работи на Стратегија за развој на земјата за наредните 20 години заедно со финансиска поддршка на амабасадата на Британија, односно Фондот за добро управување, Министерството за финансии на Словачка, со поддршка на УНДП и Владата.
-Владата како координатори задолжи двајца економски министри, тоа се вицепремиерот Фатмир Битиќи и министерот за финансии Фатмир Бесими. Работата на оваа програма започна во 2021 година и тогаш МАНУ не беше вклучена и во тој период наши експерти изготвија осум базични студии за одделни области – образование, економски развој, јавни финансии и фискална политика, туризам, рамномерен регионален развој, пазар на труд, социјална политика и пензиски систем, како и здравство, рече Фити.
Тој додаде дека кога МАНУ се вклучила во составувањето на Стратегијата во 2022 година правела ревизија во студиите, преку актуелизација на податоците.
-Направивме и базични студии за научни истражувања, за јавните институциите и за економскиот развој и зелената економија, со креирање „зелени работни места“, кажа Фити.
Тој истакна дека се изготвувале консолидирани документи за социјалната инклузивност, дигитализацијата, отпорност од кризи, владеењето на правото, родовата еднаквост и друго.
-Сето тоа е завршено и веруваме дека во втората фаза МАНУ ќе ја врши работата. Ова е многу значаен, визионерски стратегиски документ за основните развојни правци, предизвизи и визии на Република Македонија во сите сфери на општественото живеење. Пристапот мора да биде научен и објективен и да се постигне широк консензус од сите релевавнтни чинители во Македонија, кажа Фити.