ЦИВИЛ Медиа разговараше со Арбен Таравари, градоначалник на Гостивар и висок претставник на Алијансата за Албанците, за прашања поврзани со Референдумот, ставот на Алијансата за Албанците, за национализмот и говорот на омразата.
ЦИВИЛ Медиа: Кој е вашиот став и коментар во врска со сите прашања што се отворија околу референдумското прашање, дали да се биде за, против или да се бојкотира…? На локално ниво, како гостиварчани гледаат на Референдумот?
Таравари: Јас често велам дека во Гостивар е мала Македонија. Во Гостивар живеат Албанци, околу 65%, Македонци околу 20 %, Турци околу 11%… се користат три јазици и е пример за мултиетничноста во Македонија. Скоро 80% од граѓаните во Гостивар ги зборат трите јазици. Јас во својата куќа користам два јазика. Со моите родители зборувам на турски јазик, а со жената и децата на албански јазик. Со моите први комшии зборувам на македонски јазик.
Овде и кога беше војната во 2001 година немаше никаков инцидент. Си живееја луѓето заедно како да не се случува ништо. Повторно е таква атмосферата во Гостивар. Повеќето луѓе се про –референдумот и се за тоа Македонија да се интегрира таму каде што треба бидејќи бегаат млади луѓе. Моите деца веќе размислуваат како да побегнат. Ако разговарате и ако прошетате низ повеќе места во Гостивар ќе видите дека луѓето се за Македонија да се интегрира во ЕУ и НАТО. И тука нема дилеми.
Што е луксузот според мене, зборувам како човек, а не како градоначалник и политичар, тоа е дали ни треба воопшто луксузот Референдум? Или директно требаше да оди на Собрание и да се гласа? Тоа е луксуз што чини 4 милиони евра, консултативен е и повторно, кога ќе помине, ќе треба пратениците да го гласаат. Овде беше нашата дилема како Алијанса за Албанците. Дали треба да трошиме на ова? Но, што е решено вака, ние имаме и Централно собрание и таму ќе кажам како член и генерален секретар на партијата, дека атмосферата про Референдумот. Ние сме партија што ги претставува Албанците, а 88% од Албаницте се за Референдумот. Најверојатно Централното собрание ќе донесе одлука за Референдумот и повторно велам, бидејќи во недела одлучуваме, ќе имаме и активна кампања што ќе биде за интеграција, но ќе ја критикува Владата бидејќи нема никакви промени, освен во надворешната политика. Ништо друго убаво не се случува. Како опозиција ова ни е задача, да ја извршиме, бидејќи треба да се започнат реформските процеси во државата.
ЦИВИЛ Медиа: Колку ќе му наштети на позитивниот исход на Референдумот „другата страна“, онаа што е против и онаа што бојкотира?
Таравари: Секогаш ќе има спротивна страна. Повеќето граѓани, не во Гостивар, туку и во повеќе градови, атмосферата е за Референдумот. Мојата прогоноза е дека сигурно ќе помине, но дека има луѓе што размислуваат поинаку имало и ќе има и нема ништо лошо во тоа. Но, дали ќе има вилијание, најверојатно да, ништо во универзумот не е случајно. Сè што се случува има некоја причина. И тоа што се случува е последица на таа причина. Има луѓе што треба да ги анализираат. Не би сакал да навлегувам во такви анализи.
ЦИВИЛ Медиа: Ваш коментар за национализмот во Македонија?
Таравари: Идиоти имало и ќе има. Тоа се малоумни луѓе. Кога ги слушам одредени политичари како за политички поени некого ќе го наречат „шиптар“ или „циган“, тоа е веќе многу ниско. Мислам дека веќе не пали ни кај луѓето. Луѓето веќе сакаат рационализам. Сакаат нешто што е оправдано. Ако навредуваш некого, не се подигнуваш самиот. Не би ги ни спомнал и не вреди за тие луѓе да се дискутира.
Текст и фотографија: Биљана Јордановска
Текстот е дел од проектот „Патриотизам ДА, национализам НЕ!“ што го спроведува ЦИВИЛ со поддршка од Цивика мобилитас. Содржината на овој текст е единствена одговорност на ЦИВИЛ и на ниту еден начин не може да се смета дека ги одразува гледиштата на Цивика мобилитас, Швајцарската агенција за развој и соработка (SDC) или организациите што ја спроведуваат.
Услови за користење, авторски права и заштита на приватноста
Преземање на содржините под различни услови од наведените не е дозволено, освен со писмена дозвола од ЦИВИЛ. Повредата на авторските права е забранета со закон.
