Има многу слоеви во заплетканата полициска трагикомедија. Колку полиции има Македонија? Несомнено, најмалку две. Едната е професионална полиција, составена од луѓе кои се искусни и имаат извонредни вештини и знаења. Тие се придржуваат кон законите, ги штитат и им служат на граѓанките и граѓаните. Овие храбри и посветени професионалци не напредуваа во службите или беа под постојан притисок, деградирани и понижувани. Тие се немоќни да направат нешто за одбрана на законитоста и безбедноста на државата.
Втората полиција е валкана, послушничка, партиска армија која поддржува криминална клика. Таа полиција служи за сеење страв и овозможува логистика за криминалното владеење и местење избори. Таа полиција апси активисти за човекови права, новинари и опозициски лидери со полна воена опрема, со крвничко малтретирање. Во составот на таа полиција се и криминалците кои го помогнаа, а дел беа и извршители на погромот на Собранието и обидот за убиство на пратеници. Таа полиција сè уште е чизмата на криминалната клика под истрага на СЈО.
Да не заборавиме и на една полиција која е затекната во униформа, па се снаоѓа во лавиринтите на моќта и криминалното однесување по инерција, глуми дека работи, притаено и тивко, чека на подобри денови.
За оваа и ваква полиција, составена од различни, паралелни полиции, законодавниот дом треба да донесе специјален закон за итно спроведување на професионални стандарди и деполитизација. Но, пред тоа да се случи, професионалците треба да станат гласни и да побараат таков закон да се донесе, а потоа да се спроведе до последната полициска куќарка во земјата, без пардон. Тие што чекаат на подобри денови, треба да знаат дека подобрите денови доаѓаат само ако и тие учествуваат. Се разбира, на страната на законот.
Полицијата треба да биде прва, но не и последна во чистењето од партиско-мафијашки и фашистички елементи. Закон за стандарди и деполитизација треба да се донесе и да важи за сите државни и локални институции и јавни претпријатија. До последната собичка во системот, до последниот апаратчик заглибен во калта на ропската послушност и арамилакот.
Стојам на располагање да ги слушнам и прочитам вашите сведоштва.
Објавено во Плусинфо и во Слободен печат (9.5.2017)
