Поранешниот американски претседател Доналд Трамп денеска изјави дека по „протекувањето на незаконски информации“ можеби ќе биде уапсен во вторник и ги повика своите приврзаници на протест.
Во објавите на својата социјална мрежа „Социјална вистина“, Трамп алудираше на извештаите дека наскоро би можел да се соочи со кривична пријава во Њујорк за давање пари на ѕвездата од филмовите за возрасни Сторми Даниелс во замена за нејзиното молчење, објави Си Ен Ен.
Трамп не кажа дали бил информиран од некој член на органите на прогонот за претстојното обвинение.
Ен Би Си њуз вчера објави дека агенциите за спроведување на законот подготвуваат можно обвинение против Трамп на почетокот на следната недела.
Локалните, државните и федералните органи за спроведување на законот и безбедносните агенции, наводно, се подготвуваат за можноста поранешниот претседател Трамп да биде обвинет на почетокот на следната недела, според изјавите на пет високи функционери запознаени со подготовките.
Агенциите за спроведување на редот вршат безбедносни проценки, изјавија официјални лица, и разговараат за потенцијалните безбедносни планови во и околу Кривичниот суд на Менхетен, во случај Трамп да биде обвинет дека и платил на Даниелс за да молчи.
Трамп, кандидатот за републиканска претседателска номинација, го осуди „незаконското протекување на информации“ што „најавува“ дека ќе биде уапсен во вторник.
Протестирајте, вратете ја нашата земја назад, порача Трамп.
Тој негираше дека направил нешто незаконско и ја нарече истрагата на демократскиот обвинител од Менхетен, Алвин Браго, продолжување на партискиот „лов на вештерки“ против него.
Поранешниот американски претседател го обвини и Браго, кој е Афроамериканец, дека е „расист“.
Клучниот сведок во овој случај е Мајкл Коен, поранешен адвокат и „фиксер“ на Трамп (човек кој ги завршува сите проблеми во конфликтни ситуации), кој сведочеше пред големата порота минатата недела.
Коен пред федералниот суд во 2018 година призна дека незаконски и давал пари на Даниелс, како и на Плејбој зајачицата, Карен Мекдугал, да молчат за наводната врска со претседателот.
За тоа дело, но и за уште некои други, е осуден на три години затвор.
Г. Т.
