По повод конференцијата „Четири години агресија: Отпорот на Украина и одговорноста на светот“, колумнистот и македонскиот новинарски ветеран, Бранко Тричковски, за ЦИВИЛ МЕДИА изјави:
„Украина израсна во конститутивен елемент на човештвото, Украина ќе биде вредносен, морален и безбедносен критериум: или си Украинец, не по националност, туку според вредносните стандарди, или си нечовек“.
На 24 февруари 2026 година, по повод четири години од почетокот на целосната воена агресија на Русија врз Украина, Иницијативата за одбрана на демократијата (DDGI), во рамките на својата водечка програма Вестминстерска алијанса за Украина (WA4U), организираше меѓународна онлајн конференција насловена „Четири години агресија: Отпорот на Украина и одговорноста на светот“.
Обединувајќи носители на одлуки, дипломати, новинари, аналитичари и лидери на граѓанското општество од Европа и пошироко, конференцијата испрати јасна и итна порака: ова не е момент за комеморација, туку за одговорност.
Организатор и домаќин на овој меѓународен настан беше ЦИВИЛ – Центар за слобода. Модератори на трите тематски сесии беа Роџер Касале, поранешен британски парламентарец и директор на Вестминстерската алијанса за Украина, и Џабир Дерала, претседател на ЦИВИЛ и одликуван со Орден за заслуги од претседателот на Украина, Володимир Зеленски, за континуираниот ангажман во борбата против руската воена пропаганда.
М. Д.
Отпорот на Украина и одговорноста на светот — Меѓународна конференција повика на решителна акција
