Бурна недела, измешана со многу чувства, емоции, гнев, радост, тага… По посетата и заминувањето на Јоханес Хан, македонските институции почнаа да ги спроведуваат препораките за доближување на Македонија кон ЕУ и НАТО. Законот за јазиците е ставен на мирување, како што тогаш информираа владините претставници поради „побитни приоритети“.
Веројатно под „побитни приоритети“ мислеле на спроведување на акцијата за приведување на триесетина учесници кои учествуваа во крвавиот четврток, 27 април. Меѓу приведените се и екс-министерот за внатрешни работи, Митко Чавков, Богдан Илиевски – Бетмен, Борис Дамовски, оперскиот пејач Игор Дурловски, актерот Владо Јовановски… На шесттемина пратеници на ВМРО-ДПМНЕ кои ја отворија вратата на Собранието им е одземен пратеничкиот имунитет…
За прв пат, лидерот на ВМРО-ДПМНЕ, Никола Груевски застана во првиот ред од спротивната страна на кордонот со полицајци! На протестите пред Основен суд и Министерството за правда деновиве може да забележиме дека се собираат одвај стотина демонстранти. Тажно.
Појавувањето на протестот пред Кривичен суд, на некогаш надежниот боксер Груевски, ме потсети на сцената на украинскиот опозициски лидер, и шампион во бокс, Кличко кога се судри со полицијата за да ги заштити правата на своите следбеници. За среќа Груевски и неговите приврзаници се фини граѓан(к)и и ја почитуваат униформата… Проблемот е што не ги почитуваат новинарите, на видео снимка видовме како некој фраер „ќе му го напикал микрофонот во уста на новинарот, бидејќи си ја извршувал задачата“… Им остана навика на таа багра од 27 април да тепаат новинари и пратеници!
Граѓаните се поделени, додека некои сметаат дека конечно дојде правда, други сметаат дека се прави реваншизам. Симпатизерите на ВМРО-ДПМНЕ, (веројатно во недостаток на идеи) решија бледо да ги копираат методите на демонстрантите кои протестираа против груевистичкиот режим. Да не се смешни би биле тажни телефонските пораки што ги испраќаат до нивните приврзаници. Прво ги повикуваат на протест пред Министерство за правда, потоа им испраќаат друга порака дека е откажан протестот. Потоа стига друга порака дека во 18 часот ќе протестираат. Сигурно им остана во глава она „секој ден во шест“! Почнаа да блокираат крстосници, како што правеа активистите на Шарената револуција. Така што останува да видиме кога ќе почнат да ги фарбаат институциите со боја?!
Разликата помеѓу демонстрантите е во тоа што едните протестираа против груевизмот, режимот, крадењето, диктатурата, за слобода…, додека пак сегашните демонстранти протестираат за одбрана на режимските нарачатели и извршители. Има разлика!
Порано граѓаните едвај чекаа да гукне нешто претседателот Ѓорѓе Иванов, но по аболицијата на 56 функционери и нивни соработници, граѓан(к)ите се крстат и се молат да не каже ништо. Меѓутоа, не би бил татко на нацијата ако во оваа ситуација не повика на разум и дијалог. Меѓутоа граѓаните се прашуваат зошто секоја вечер во претседателскиот кабинет, во тајност преговараат Заев, Груевски, Ахмети, Џафери… Никој не сака да даде подетални информации за што се договараат.
Во јавноста, а најмногу помеѓу Твитер заедницата, ноќните разговори се наречени #ТретаСмена. А на граѓан(к)ите во ноќните часови некако почна да им фали емисии од типот на „Омилена поза со Хелена Роза“… Во овие ладни зимски ноќи на граѓаните им остана само можноста да се топлат со таинствените „Жешки разговори во Водно“…
