Министерката за труд и социјална политика Мила Царовска, заедно со претставници на УНИЦЕФ, УНДП и делегацијата на Европска Унија, денеска во 13.30 часот, ќе го посети новиот групен дом во Неготино, во кој ќе бидат сместени три деца со интелектуална попреченост, досега згрижени во Специјалниот завод Демир Капија.
Со тој чин повторно се интензивира процесот на деинституционализација, што вклучува развој на социјални услуги во заедницата.
Во иднина, грижата за децата и лицата со попреченост ќе биде достапна онаму каде што живеат, а не во големи, безлични и сегрегирачки институции.
Предвидено е Царовска попладне да има средба со жителите на село Тимјаник, кои во петокот излегоа на протест и го блокираа патот Тимјаник – Дисан, во знак на револт на одлуката на министерството. Нивните образложенија се дека немаат ништо против децата со попреченост, но наводно, приоритет им е да се отвори детска градинка во селото, наместо групни домови.
Царовска на социјалните мрежи ја изрази својата разочараност и изненаденост од реакциите на граѓаните по повод отварањето на мал групен дом за деца со попреченост во с. Тимјаник.
Таа истакна дека станува збор за дом каде ќе се сместат неколку деца кои на ниеден начин не претставуваат закана за локалните жители, ниту пак ќе влијаат на секојдневито на граѓаните.
„Овие деца, од кои за жал повеќето се неподвижни, се преместуваат како би имале похумани услови за живот и семејна атмосфера. Жално е што се уште постојат толку предрасуди, но токму против ваквите размислувања силно се бориме. Сакам да им порачам на сите кои се плашат или се загрижени дека нема никаква потреба за тоа. Децата во домот не се никаква опасност за нив или нивните деца, ќе бидат под 24 часовна грижа и нема да им го нарушуваат животот.
Се надевам дека ќе преовлада разумот и дека на крајот ќе имаме успешен процес на преселба на децата од институциите во малите домови“-пишува министерката за труд и социјална политика, Мила Царовска.
Денеска, во Неготино ќе бидат донесени трите деца од заводот, кои ќе бидат сместени во државен објект, познат како старата зграда на социјалната служба.Станува збор за деца на возраст од 10 до 16 години, од кои дури две се во количка.
Министерката за труд и социјална политика, Мила Царовска заедно со претставници на министерството ќе биде присутна во градот. Од министерството ни изјавија дека ќе отидат и во Тимјаник, на средба со загрижените жители каде ќе можат отворено да разговараат за сите прашања.
Жителите на Тимјаник, јавно повикаа на масовност за време на средбата, со цел да и кажат на министерката дека се против одлуката за доселување на децата, како што потенцираат, во интерес на иднината на нивните деца. На социјалните групи посветени на општината, деновиве се води вистинска војна по повод ова прашање. Додека дел од граѓаните не сакаат да слушнат да имаат во својата близина деца со посебни потреби, дел пак, се прашуваат каде се човечноста и хуманоста во нашето општество.
К. С.
