ЏАБИР ДЕРАЛА
По неколкугодишна работа на иницијативи и активизам за човекови права, промоција на мултикултурализмот, слободата и еднаквоста во нашата земја, решивме да ја основаме организацијата на која ѝ дадовме едноставно име: ЦИВИЛ. Во периодот пред основањето, посебно би сакал да го издвојам неколкудневниот фестивал „Мултикултура“ во 1996 година каде што учествуваа уметници, поети и музичари и од БиХ и Велика Британија.
На 25 ноември 1999 година, една група македонски граѓанки и граѓани и една Македонка, американска граѓанка, ги удрија темелите на, како што велат некои, а ние, без лажна скромност, го повторивме во соопштението: една од најпознатите организации на граѓанското општество во Република Северна Македонија, ЦИВИЛ – Центар за слобода. Групата основачи беше составена од интелектуалци, уметници, новинари, еден бизнисмен и еден работник.
Дваесет и две години подоцна, можеме да констатираме: без калкулации, доследни и бескомпромисни, влеговме во сите битки на македонското општество за демократија и човекови права. Помагавме, колку што можевме и на другарките и другарите во регионот. Не изостана нашето учество ниту во глобалните иницијативи. На секој предизвик одговараме со акција, на секој проблем му спротивставуваме решение.
За дваесет и две години, организацијата спроведе повеќе од 100 проекти во повеќе критични области од општествено-политичките процеси во земјата. Беше пионер на процесот за мир и помирување во 2001 година, една од најпознатите организации која се бореше против нелегалното оружје, водеше големи национални кампањи посветени на мултикултурализмот, човековите права, слободата и демократијата. Популарноста на ЦИВИЛ далеку ги надминува границите на нашата земја и во моментов е една од најреспектабилните граѓански организации на Балканот.
Секој 25-ти ноември е голем ден за нас. Тоа е потсетник за нашата посветеност, доследност и цврстина. Другарки и другари, ви посакувам уште многу успеси во работата и во граѓанскиот ангажман за јакнење на демократијата, владеењето на правото, европските и зелените вредности, мултикултурализмот, социјалната правда, мирот, безбедноста и човековите права и слободи во земјата и во светот.
Благодарни сме за несебичната поддршка и огромната доверба која ни ја подаруваат граѓанките и граѓаните.
Во името на ЦИВИЛ и во свое име, им благодарам и на сите донатори во текот на овие 22 години. Нивната помош е драгоцен придонес кон нашите заложби за подобро утре на сите граѓанки и граѓани на Северна Македонија и на целиот свет.
Се гордеам што сум дел од ЦИВИЛ. И знам дека моите другарки и другари, сите прогресивни граѓанки и граѓани, со целосна доверба, ќе продолжат со својата поддршка на идеите на нашата организација која изградена на тој начин што е сопственост на прогресивната јавност, на сите правдољубиви и мирољубиви луѓе во светот.
Ќе останеме доследни на принципите и ставовите за кои говоревме од првиот ден на постоењето на ЦИВИЛ. Борбата продолжува.
