Во пресрет на новогодишните и празници, ЦИВИЛ упатува апел до сите граѓанки и граѓани во земјата да прославуваат безбедно, без употреба на распрскувачки материјали и оружје.
ПРОСЛАВЕТЕ БЕЗБЕДНО!
ЦИВИЛ потсетува дека славеничкото пукање е забрането со закон и е опасно по животот и здравјето. Бројни се примерите на трагични завршетоци на прослави и веселби кога заскитан куршум убил или повредил случаен минувач или учесник на прославата.
Распрскувачките материјали и петардите се опасни по здравјето и животот. Во еден прирачник на ЦИВИЛ за едукација на деца и млади за безбедно однесување се вели:
„Петардите и распрскувачките материјали, како и оружјето, се опасни и често предизвикуваат трагедии дури и во редовите на професионалци на кои во описот на работното место им е ракување со експлозиви и оружје.“
Децата се најчести жртви на трауми, повреди, па и трагедии, поради несовесното ракување и злоупотребата на оружјето и распрскувачките материјали.
Кога несовесни лица го злоупотребуваат оружјето за славеничко пукање, одговорните родители треба да им кажат три едноставни безбедносни правила на своите деца:
- да се оддалечат од местото на славеничко пукање,
- да не допираат оружје или експлозиви и
- да пријават незаконска употреба на оружјето.
Овие безбедносни правила, се разбира, важат и за возрасните.
ЦИВИЛ потсетува дека домашните миленици се посебно сензибилни на звуците од распрскувачките материјали и петардите. Особено кучињата, кои често се обидуваат да побегнат кога се исплашени од петардите, може да се повредат, а често и да има фатални последици. Многу од овие животни може да завршат неколку километри од дома, бегајќи од страв.
ЦИВИЛ и оваа година се придружува кон повикот на МВР да не се употребуваат петарди и други пиротехнички средства неовластено и ги повикува граѓанките и граѓаните да го пријават несовесното и противзаконско однесување.
Исто така, ЦИВИЛ потсетува дека употребата на пиротехнички средства, вклучително и огнометите кои на новогодишната ноќ ќе бидат „задолжителен“ декор на ноќното небо, дополнително придонесуваат до аерозагадувањето.
ЦИВИЛ ги поздравува и превентивните активности на МВР преку кампањата „Петарди НЕ – безбедност пред СЀ”, кои ги посетија училштата во повеќе општини низ државата и преку едукативни и информативни разговори ги запознаваа учениците со забраната за користење на пиротехнички средства.
#СлаветеБезбедно
ЦИВИЛ
ТРИ БЕЗБЕДНОСНИ ПРАВИЛ НА ЦИВИЛ:
-
ОДДАЛЕЧИ СЕ од местото на славеничко пукање
-
НЕ ДОПИРАЈ оружје или експлозиви
-
ПРИЈАВИ незаконска употреба на оружје