Во израелско-палестинската војна досега загинаа 41 новинар. Триесет и шест од нив се палестински новинари убиени во израелските напади во Појасот Газа. Репортери без граници (РСФ) поднесе тужба до Меѓународниот кривичен суд поради извршени воени злосторства врз палестински и израелски новинари, и бараат итна заштита на медиумските работници, пишува АП.
Повеќе од 50 медиумски простории беа целосно или делумно уништени од израелските напади. Последна беше канцеларијата на агенцијата Франс прес. Никаде не е безбедно за новинарите во Појасот Газа, оценува меѓународната невладина организација фокусирана на заштита на правото на слобода на информирање.
Без разлика дали се на отворено, работат во шатори поставени во близина на болници или работат во своите домови или импровизирани засолништа со своите најблиски, новинарите во Појасот Газа кои продолжуваат да известуваат за една од најсмртоносните војни на овој век се во постојана, непосредна смртна опасност.
Репортери без граници поднесе тужба до МКС за воени злосторства извршени врз палестински и израелски новинари од почетокот на конфликтот во Појасот Газа на 7 октомври.
Според организацијата, тие биле убиени и повредени за време на нивната работа и биле жртви на напади кои „во најмала рака се воени злосторства што ја оправдуваат истрагата на обвинителот на МКС“.
Во тужбата на Репортери без граници, поднесена до обвинителството на МКС на 31 октомври, се наведуваат случаите на деветмина новинари убиени за време на својата работа од 7 октомври и уште двајца ранети, исто така, за време на нивната работа. Во текстот се наведува и намерно, целосно или делумно уништување на просториите на повеќе од 50 медиуми во Газа.
Според податоците на меѓународната невладина организација, од почетокот на војната меѓу Израел и Хамас се убиени 34 новинари, од кои најмалку 12 за време на нивната работа – 10 во Газа, еден во Израел и еден во Либан.
Ова е трета тужба на Репортери без граници до МКС за воени злосторства против палестински новинари во Газа од 2018 година.
Првата беше поднесена во мај 2018 година поради новинари кои беа убиени или повредени за време на протестот „Големиот марш на враќање“ во Газа. Втората беше поднесен во мај 2021 година по израелските воздушни напади врз повеќе од 20 медиуми во Појасот Газа.
Репортери без граници, исто така, ја поддржа тужбата на Ал Џезира во врска со пукањето на палестинската новинарка Ширин Абу Аклех на Западниот Брег на 11 мај 2022 година.
Г. Т.
