Во Македонија неофицијално се убиени петнаесет жени во периодот од 2013 до 2016 година, само затоа што се жени. Ова денеска е соопштено на конференцијата: „Фемициди-убиства на жени, само затоа што се жени“, што ја одржа организацијата Националната мрежа против насилство врз жени и семејно насилство, во соработка со Обединети Нации.
Според Елена Димушевска, извршна директорка на организацијата, во Македонија фемицидот не е регулиран како посебно кривично дело, а загрижува фактот што нема официјална статистика за извршените убиства на државно ниво.
„Од 2013 до 2016 година има регистрирано 15 убиства, но тоа не е официјална статистика и не ја претставува реалната бројка. Од Државниот завод за статистика има податок дека од 2008 до 2016 година има убиени 70 жени, но сега се врши анализа колку од нив се фемициди. Жените жртви се на различна возраст“, рече Димушевска.
Овие жени претходно биле жртви на насилство, но, немале доволно информации каде и како да побараат заштита во надлежните институции.
„Тие што пријавиле во полиција или во центрите за социјална работа, не добиле соодветна реакција, односно не се преземени соодветни мерки и жената била убиена. Повеќе од 90 проценти од убиствата се случувале во домот или доколку сопружниците се разделени се случуваат во куќата на жртвата. Најнебезбедно место на жртвите е нивниот дом“, забележува Димушевска.
Вирве Вимпари од делегацијата на ЕУ, рече дека фемицидот е еден вид дискриминација и дека е причина и последица на родовата нееднаквост. За да се заштитат жртвите, според Вимпари неопходно е да се обезбеди правна помош.
Од Министерството за труд и социјална политика (МТСП), информираат дека веќе е формирана работна група од претставници на меѓуресорски групи и невладини организации и дека интензивно се работи на отворање Центар за жртви на сексуално насилство.
„Една од стратегиските определби на Владата на РМ и Министерството е преземање на одговорни мерки во насока на справување со насилството врз жените. Потребна е сеопфатна национална стратегија и политика, којашто ќе значи справување со насилството. Во таа насока МТСП започна со интензивни активности во насока на ратификација на Истанбулската конвенција“, информираше Светлана Цветковска, претставник од МТСП.
М.Т.
