Опозициската партија ВМРО-ДПМНЕ се придружи кон јавниот повик на ЦИВИЛ – Центар за слобода кој го упати до сите политички партии да ја поддржат иницијативата за општествено-политичко обединување за европска иднина на нашата земја.
-ВМРО-ДПМНЕ со свој придонес кон иницијативата за општествено и политичко обединување за европски вредности и интеграција во ЕУ, напишаа од партијата на својот профил на Фејсбук.
На ФБ страницата на партијата е споделен линкот од македонската верзија од познатиот италијански хит „Инсиеме/Заедно“ со која Тото Кутуњо победи на Евровизија во Загреб 1990 година. Во иницијативата учествуваа повеќе од 15 македонски музички и актерски ѕвезди.
„Без оглед на разликите во политичките програмски определби, без оглед на разликите во ставовите и честите препирки во јавноста, најголем дел од политичкиот естаблишмент во нашата земја се согласува барем во едно, а тоа е членството во ЕУ“, се вели во јавниот повик на ЦИВИЛ.
Партиите можат својата поддршка за проевропската иницијатива да ја изразат и преку соопштение до јавноста во која ја изразуваат поддршката за Иницијативата на Цивил за општествено и политичко обединување за европската иднина, изразено и преку продукција на македонската верзија на песната Инсиеме/Заедно.
С. Т.
