Ако ние заедно со ЕУ не ги делиме истите вредности, тогаш нормално нема да сакаме да сме дел од некоја Унија со која немаме исти принципи во случај на неприфаќање на тоа што ВМРО-ДПМНЕ го има и негува како вредност, изјави портпаролката на ВМРО-ДПМНЕ, Марија Митева во нејзиното гостување на „Само вистина“ на Канал 5.
Таа ова го изјави во обид да ги толкува изјавите на претседателот на опозициската партија, Христијан Мицкоски кој рече дека е подготвен да разговара за вредностите и дека одредени вредности ќе исчезнат по следните избори.
Со ваквите изјави и јавни настапи на ВМРО-ДПМНЕ се поотворено опозициската партија застанува против членството на државата во Европската Унија и станува јасно зошто го блокираат евроинтегративниот процес.
Претходно, Мицкоски изјави дека ќе разговара за коалиција со анти-ЕУ и анти-НАТО партијата Левица за формирање на идната влада, наговестувајќи дека со нив ќе преговара за вредностите.
„Никогаш во политиката не велете никогаш. Тие вредности се ставаат на маса и се прави политички договор, дали ги делиме тие вредности или не ги делиме. Некои вредности ќе доминираат, некои ќе исчезнат. Тоа е политички дијалог што се прави по изборите“, рече Мицкоски.
Со ова ВМРО-ДПМНЕ покажуваат дека со цел доаѓање на власт се подготвени да ги жртвуваат и стратешките интереси на земјава и пополека се откажуваат и од декларативните заложби за членство во ЕУ.
