Опозиционата ВМРО-ДПМНЕ денеска на адреса на СДСМ и на премиерот Зоран Заев упати жестоки критики, обвинувајќи ги за партизација на државата, наспроти предизборните најави дека ќе водат политики за департизација и деполитизација!
ВМРО-ДПМНЕ посочува на примери со концентрација на моќта на одделни партиски кадри од СДСМ. Посочуваат на примерот со министерот за внатрешни работи Оливер Спасовски, кој според нив, е унапреден во потпретседател на СДСМ, а токму оваа партија го критикуваше ВМРО-ДПМНЕ, затоа што Гордана Јанкулоска беше и министер и партиски функционер.
„Граѓаните гледаат дека едно е ‘СДС’ во опозиција, а друго е ‘СДС’ на власт. Оливер Спасовски наместо да се повлече од партиските функции и да ја одддели партијата од МВР, како што ‘СДС’ ветуваше пред избори, тој сега е унапреден во потпретседател на СДС. Оливер Спасовски е назначен за потпретседател на СДС, бидејќи треба да ги реализира нарачаните партиски чистки во МВР и треба да ги елиминира сите професионалци, што во изминатиов период работеа на случаите против криминалците и наркодилерите, блиски до Заев“, критикуваат од ВМРО ДПМНЕ.
Обвинуваат дека „преклопувањето на партијата со Mинистерството за внатрешни работи е дел од стратегијата на ‘СДС’, да ги стави под своја капа органите на прогонот и правосудниот систем“.
„Оваа стратегија започна со заканите кон судиите за генерален реизбор, а продолжи со иницијативата на Заев за смена на Републичкиот јавен обвинител кој го гони за случајот ‘Поткуп’“, стои во партиското соопштение на ВМРО-ДПМНЕ.
Според толкувањата на најголемата опозициона партија, овие политики на СДСМ се всушност, стратегија на лидерот Заев, за да се спаси себеси од кривично гонење и процесуирање на кривичните пријави против него и луѓето блиски до него.
ВМРО-ДПМНЕ ги повикува професионалците во МВР, Обвинителството и судот да не потклекнуваат на притисоците од СДСМ, зашто тоа е нивна должност и одговорност пред граѓаните, „да постапуваат исклучиво според Уставот и законите, а не пред партиските наредби на потпретседателот на ‘СДС’ или кој било друг партиски функционер“, стои меѓу другото, во соопштението од ВМРО-ДПМНЕ.
M.Taлеска
