Граѓански новинар од Пробиштип ни испрати информација дека десетина рудари од рудникот „Злетово“, во вторникот на 18 јули се затруле со храна!
Иако нема официјална потврда, сомневањата се дека рударите за затруени со храна од работничката менза.
Центарот за комуникации на ОО на СДСМ во Пробиштип, испрати соопштение според кое, затруените рудари биле од првата смена. Откако појадувале во мензата, храна од работничката менза, по неколку часови, рударите се пожалиле на болки и имале вртоглавица, дијареја и нагон за блуење. По интервенција на Итната медицинска помош, се претпоставува дека причина за труењето било неисправно млеко, но за тоа се чека официјална потврда.
Рударите во Пробиштип ги посетила Санитарната инспекција, како и претставници од Институтот за јавно здравје од Штип, кои земале мостри и официјалните резултати за прични за ттруењето се очекуваат за неколку дена.
Локалната организација на СДСМ апелираше за итно и целосно расветлување на случајот, и постави отворени прашања до македонската јавност, но пред сè, до локалната власт: Која фирма обезбедува храна за вработените во рудникот во Пробиштип и кој е нејзиниот вистински сопственик? Дали е поважен профитот од човечките животи?
Како опозиција на локално ниво, СДСM порачува дека ништо не е поважно од здравјето и од благосостојбата на рударите!
При последната посета на екипа на ЦИВИЛ – Центар за слобода, наши соговорници – поранешни рудари, се пожалија на условите за работа во рудникот, на недоволната вентилација со што поради недостаток на воздух не може да функционира дел од машините, на недостатокот на ХТЗ опрема, на неадекватната кадровска политика, партизација и непотизам, на неплаќање на прекувремените часови, односно, надоместување само со слободни денови…
ЦИВИЛ Медиа побара информација за здравствената состојба на рударите од менаџментот на рудникот „Злетово“ во Пробиштип, но нашата соговорничка ни рече дека во каннцелариите нема лице кое има ингеренции да дава такви информации и вети дека дополнително ќе ни се јават.
Со оглед на гласиштата во Пробиштип кои фирмата која обезбедува храна за рударите ја доведуваат во врска со градоначалникот Тони Тоневски, се обидовме информација за актуелниот инцидент да добиеме и во Општината. Градоначалникот беше отсутен и немало да се врати до крајот на работниот ден, но и оттаму ни беа ветени дополнителни информации следните денови.