„Како што реков, Никола Груевски, никогаш повеќе нема да е премиер на Македонија. Се докажа дека го нема потребното мнозинство да формира влада. ВМРО-ДПМНЕ, на полноќ ја изгуби можноста да формира влада. Македонија нема повеќе време за губење. Демократските процеси се почнати. Така одлучија 612.000 граѓани од сите етнички заедници“, рече денеска на прес-конференција, претседателот на СДСМ, Зоран Заев.
„Очекувам претседателот Ѓорге Иванов да ми го додели мандатот за формирање на влада. Сите поинакви опции значат кршење на Уставот и злоупотреба на функцијата. Граѓаните избраа промени! Потребна е влада која ќе ја изрази вољата на сите граѓани. Влада која ќе ги обедини граѓаните, место да ги дели. Потребна е стабилна и одговорна влада, која ќе обезбеди подобар живот и реални политики. Ние сме подготвени и посветени на формирање на влада којашто ќе ги спроведува реформите договорени со Пржино и со итните реформски приоритети на Прибе. Воспоставување на владеење на правото и воспоставување на институции во служба на сите граѓани, тоа значи еднакви права и можности пред институциите. Македонија да биде едно општество за сите граѓани. Тоа им го ветивме на граѓаните, тоа можеме и знаеме да го направиме“, изјави Заев.