Македонскиот премиер Зоран Заев вели дека е оптимист за решавање на спорот со Грција, но додава дека важни во преговорите се идентитетот и достоинството. Оптимизмот го темели на тоа што, како што посочува, од седумте појдовни точки за три веќе е постигната согласност.
– Медијаторот Нимиц го води процесот, тој ги знае во суштина работите кои можат да поминат, кои не можат да поминат кај едната и кај другата страна. Важно е да се гради довербата помеѓу двете страни во функција на решавање на проблемот. Мене ми е драго што се разглобени во суштина сите отворени прашања. Ако тргнеме од некои седум позиции кои беа појдовните точки на разговорите, знам дека веќе е намалено на четири позиции, три се отстранети. Јас верувам дека со политиката на новата Влада многу брзо ќе можат да се отстранат и другите позиции, изјави вчера Заев.
Потенцира дека, веројатно тие биле најлесните прашања, но како што рече, тоа треба да биде сигнал за нас и охрабрување за грчката страна дека е можно да се изнајде решение.
– Секако, суштинските позиции се многу значајни, името, Уставот дали ќе се менува или не, јазикот и други работи кои таму се спомнуваа. Тоа е суштината на самиот преговарачки процес и можноста за изнаоѓање на решение, рече Заев.
Потенцира дека Република Македонија сака решение, а Владата, како што наведе, прави буквално се, се обидува да гради внатрешен консензус во државата, во функција на изнаоѓање конечно решение.
– Ако бидеме навистина оптимисти во овој процес, ако сакаме навистина искрено да се изнајде решение, тоа е можно, процесот има временски период пред себе. Се надевам дека секој следен чекор ќе не приближува во делот на сите оние ставки кои се отворени, а буквално треба да бидат мост на сплотување и конечно изнаоѓање решение на проблемот со името кој Република Грција го има со нашето уставно име, рече Заев.
Потврди дека географската одредница е прифатлива опција за македонската страна и посочи дека се споменуват неколку имиња.
– Тоа значи за нас е прифатливо име со географска одредница, односно ги отстрануваме сите други кои беа временска одредница, или некои други укажувања кои беа како предлози, информираше премиерот.
Очекува двете страни да бидат прагматични, а евентуалното решение да биде потврдено на референдум.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини
