Во текот на тридневните борби на Блискиот Исток, беа испукани повеќе од 800 ракети PAC-3 што се користат во системите за воздушна одбрана „Патриот“ произведени во САД. Ова го изјави претседателот Володимир Зеленски на брифингот за медиумите по состанокот на владата.
Изјавата доаѓа во време кога тензиите продолжуваат да ескалираат на Блискиот Исток откако САД, во заедничка операција со Израел, извршија напади врз неколку ирански градови на 28 февруари во кои беше убиен врховниот лидер на Иран, Али Хамнеи.
„Украина никогаш немала толку многу ракети за одбивање на напади. Само во последните три дена се употребени повеќе од 800“, рече Зеленски.
Според Кијив Индепендент, Зеленски кажал дека, кога Украина за прв пат се соочила со ирански дронови од типот Шахед во 2022 година, користела „сè што имала“ за да ги одбие нападите. Сепак, претседателот додаде дека Украина оттогаш стекнала значително искуство во спротивставувањето на ваквите напади.
„Сите разбираат дека (ракетите) „Патриот“ не се доволни“, рече Зеленски.
Зеленски повтори дека Украина е подготвена да обезбеди пресретнувачи на дронови во замена за ракети, иако не прецизираше кои земји би можеле да бидат вклучени.
Зеленски додаде дека Украина е подготвена да ја сподели својата експертиза со земјите што се соочуваат со ирански напади за да помогне во заштитата на цивилите и нафтената инфраструктура на Блискиот Исток.
Ракетите пресретнувачи Патриот од американско производство се меѓу ретките оружја способни ефикасно да ги пресретнат балистичките ракети што Русија ги користи за да ја нападне Украина.
ЦМ Деск
