Во текот на изминатиот ден, Русија изврши речиси 150 напади врз украински позиции и повеќе од 4.500 гранатирања, вклучително и со тешко вооружување, објави претседателот на Украина, Володимир Зеленски, на Фејсбук, пренесува Укринформ
„Речиси 150 руски напади врз нашите позиции и над 4.500 случаи на гранатирање, вклучително и со тешко вооружување. Најтешката ситуација беше во правец на Покровск. Благодарен сум на сите наши војници – секој војник, водник и офицер – за нивната отпорност и за одбраната на нашите позиции“, се вели во пораката.
Всушност, Русите се обидоа да продолжат со офанзива под маската на нивниот масовен напад. Додека најголемиот дел од украинските сили беа фокусирани на одбрана од ракети и беспилотни летала, Русите значително ги интензивираа своите копнени напади. Тие беа пречекани со достоен одговор.
„Сакам особено да ги пофалам војниците од нашата 72-ра одвоена механизирана бригада и 59-та одвоена јуришна бригада на силите за беспилотни системи кои му нанесоа значителни загуби на окупаторот. Исто така, го пофалувам ефикасното работење на 100-та одвоена механизирана бригада и 12-та оперативна бригада на Националната гарда на Украина за демонстрирањето на отпорноста и резултатите што ни се потребни“, додаде претседателот.
Зеленски, исто така, објави дека експертите и специјалистите за судска медицина ги испитуваат местата на ударите на ракетите и беспилотните летала, ги утврдуваат и проверуваат околностите на соодветните напади и вршат анализи на пронајдените фрагменти од ракети и беспилотни летала за да соберат целосни информации за оружјето и критичните компоненти што биле испорачани на Русија или Северна Кореја од трети земји и користени во производството.
Како што објави Укринформ, на 24 април имало 133 борбени судири меѓу украинските сили и руските трупи, од кои 51 се случиле во секторот Покровск.
Д. Мишев
