ЦИВИЛ – Центар за слобода изрази згрозување и најостра осуда на актите на насилство во Скопје и во другите градови во Република Македонија, по вчерашните протести на граѓанската иницијатива „За заедничка Македонија“, упати повик за одговорност од сите политички апарати во земјата, како и апел до граѓан(к)ите да не наседнуваат на провокации.„Одговорни за говорот на омразата и за повиците на етничко и политичко насилство во земјата се токму структурите на моќта кои сè уште се на власт, а чии високи претставници се под истрага за сериозни криминални дела, злосторничко здружување, тешки злоупотреби и изборни измами“, стои во реакцијата на ЦИВИЛ.
„ЦИВИЛ го препознава ракописот на авторите на ова сценарио. Јавните повици на насилство ги упатија токму највисоките претставници на владејачката партија, а постапките на нивните коалициони партнери и соучесници во криминалното владеење не заостануваа зад нив во продлабочување на кризата и поттикнувањето или овозможувањето на тензиите.
Се пролеа крв и луѓе завршија во болници со тешки повреди. Се тепаат новинари кои ја вршат својата работа, да ја информираат јавноста за настаните. Тоа е неприфатливо и мора веднаш да престане!“, се вели во соопштението до јавноста.
ЦИВИЛ го повика Министерството за внатрешни работи да преземе итни мерки и акции за спречување на ескалација на насилствата.
„Го потсетуваме МВР на деновите кога истураше тешко вооружени оклопни полициски грамади врз демонстрантите кои навистина мирно протестираа и бараа слобода, правда и демократија. Обезбедувањето на протестите на кои им претходеа отворени повици на насилство е прилично скудно овие денови. Со која цел? Го потсетуваме министерот за внатрешни работи дека отсуството на прописна законска реакција е рамно на соучесништво, ако не и поттикнување на насилство, за што ќе мора да одговара еден ден“, реагира ЦИВИЛ.
ЦИВИЛ ги повика граѓанките и граѓаните на земјата да не подлегнуваат на манипулациите и повиците на лажна одбрана на нешто што не е доведено во прашање.
Ваквата реакција на ЦИВИЛ – Центар за слобода следи по синоќешните немири во Скопје, кога новинар и камерман од редакцијата на порталот А1 Он, беа брутално претепани пред Триумфалната порта, од петорица демонстранти.
„Тепањето новинари и недолжни минувачи, не само што е тежок криминал, туку е крајно неморален и кукавички чин!
Да се бара слобода, правда и демократија е возвишена човечка должност и одговорност, не предавство. Да се тепа, мрази и брани криминалот – тоа е предавство!“, заклучува ЦИВИЛ.
