Етничките тензии во земјава се во пораст. Деновиве, во ЦИВИЛ – Центар за слобода беше пријавен случај со етнички и верски мотивиран говор на омраза и физичко насилство врз една граѓанка од македонско етничко потекло која живее во средина во која доминираат етнички Албанци. Како што беше објавено и во колумната „Курвиче, ќе ве истребиме сите, а тебе ќе те распнеме на крст!“, животот на нашата сограѓанка е исполнет со страв и неизвесност пред насилничкото однесување на неколкумина нејзини соседи. Според сведочењето, таа често е малтретирана, а и физички е нападната три пати. Нејзината единствена „вина“ е што е Македонка!
Маалските насилници ја нарекуваат со погрдни имиња како „курва, ороспија, каурка…“. Кога ќе се појави на улица, често ѝ довикуваат: „Сите ќе ве истребиме! Оди си од тука!“, „Ќе те распнеме, каурко! Како оној вашиот, ќе те распнеме и ќе те сечеме на парчиња!“.
Откако е натепана последниот пат, не спие во својот дом, во кој израснала и каде што само до пред некоја година немала никакви проблеми. Нејзините проблеми не завршуваат таму. Таа е разочарана и од полицијата од која побарала заштита по последниот физички напад ден по Божик. Според нејзините зборови, во полициската станица ја третирале како криминалка, како таа да е насилникот. Вели дека ѝ го смениле и исказот. Сега се плаши и од нив, полицајците.
Веднаш по пријавувањето на овој случај, ЦИВИЛ се обрати до МВР и очекува овој случај да се реши час поскоро. Воедно, ЦИВИЛ ја известува јавноста дека, особено по објавувањето на сторијата во неколку медиуми, порасна бројот на пријави за етнички мотивиран говор на омраза и насилство од целата земја. Мета на противзаконско дејствување, говор на омраза и насилство се и Албанци и Роми, како и претставници на други етнички или верски заедници.
Во ЦИВИЛ се убедени дека ова е последица на деструктивното дејствување на одредени политички структури, како и на наталожените нерешени проблеми во сферата на меѓуетничките и меѓуверските односи во земјава. „Може да се очекува продлабочување на јазот меѓу етничките и верските заедници, поради долгогодишното занемарување на нерешените проблеми“ – изјави Џабир Дерала, претседател на ЦИВИЛ.
„Не смее да се дозволи вештачки наметнати и делумни решенија да ги регулираат односите меѓу граѓанките и граѓаните од различните заедници. Ако Шарената револуција и предвремените парламентарни избори во декември 2016 година покажаа дека Македонија може да биде земја за пример во регионот и многу пошироко, сега гледаме поинаква ситуација. Од една страна, тоа е последица од деструктивното дејствување на одредени политички, но и криминално структури во земјата на кои им одговара раст на тензиите и насилството, но од друга страна, забележлива е и пасивноста, корумпираноста и некомпетентноста на институциите во кои реформите сѐ уште не се започнати или се спроведуваат со далеку побавно темпо од очекуваното.“ – истакна Дерала, автор на колумната која привлече големо внимание во јавноста.
ЦИВИЛ не ги обелоденува деталите од случајот, како ни податоци од комуникацијата со институциите и другите активности со цел да ја заштити безбедноста на изворот, но најавува дека во текот на наредните недели ќе започне со уште поинтензивно обелоденување на случаите во кои поединци или групи се мета на говор на омраза и насилство мотивирано по различни основи – етничка, верска, родова или сексуално определување. Воедно, ЦИВИЛ ги повикува сите граѓанки и граѓани да се обратат до ЦИВИЛ секогаш кога ќе се соочат со овие проблеми.
„Тоа мора да престане веднаш! Полицијата, градоначалниците, сите ресори во Владата се повикани да го прекинат синџирот на омраза и насилство. Ги повикуваме граѓанките и граѓаните да се солидаризираат со секој што е мета на омраза и насилство, а секој настан од овој вид да го пријават кај нас.“ – апелираат од ЦИВИЛ.
Како и во минатото, така и во иднина, ЦИВИЛ ќе продолжи категорично да бара од институциите да преземат сериозни и решителни мерки да ја искоренат дискриминацијата, но и некомпетентноста од своите редови и решително да ги санкционираат сите облици на говор на омраза и насилство против поединци и групи.
