ЦИВИЛ – Центар за слобода ќе го набљудува референдумот во Општина Босилово што ќе се одржи во недела (3 септември), а на кој граѓанките и граѓаните на Босилово ќе се изјаснат за работењето на рудникот Иловица.
На референдумското гласачко ливче ќе бидат поставени две прашања, едното дали граѓаните се „за“ или „против“ отворање на рудникот за бакар и злато – Иловица, и другото, дали се „за“ или „против“ отворање и ископ на метали или металична руда.
Во текот на денешниот ден, Општинската изборна комисија треба да излезе со конечните списоци за бројот на гласачи кои своето право на глас ќе го искористат на 19-те гласачки места.
Во струмичкиот регион ќе се организира референдум и во Општина Ново Село што ќе се одржи на 17 септември.
ЦИВИЛ и натаму продолжува со поддршката на демократското право на граѓанките и граѓаните на Македонија да го искажат своето мислење за отворањето на рудници ширум земјата, директно преку своите мониторинг тимови кои им стојат на располагање на сите кои сакаат да пријават нерегуларности, закани, притисоци и уцени.
Пријавите за нерегуларности може да се поднесуваат на тел: 075/389 698 и 075/389 699, а на располагање е и веб- страницата Слободни избори за пријава на изборни нерегуларности, или преку порака на Фејсбук страницата Слободни избори.
Пријава на политички притисоци, мобинг и дискриминација е онлајн аликација достапна на граѓанките и граѓаните во секое време да пријавуваат нерегуларности.
ЦИВИЛ во текот на референдумот ќе ја информира јавноста преку соопштенија, преку прилози на веб-страницата ЦИВИЛ Медиа и преку информации на социјалните мрежи на ЦИВИЛ за резултати од набљудувањето на терен.
Засега, ЦИВИЛ останува единствената организација која ги следи сите референдуми во континуитет, од самиот почеток, од неуспешниот референдум за ГТЦ, до последниот референдум во Валандово.
Во Гевегелија и Богданци беа забележани, помали технички недоследности, додека во Дојран мониторинг тимовите на ЦИВИЛ забележаа и притисоци врз населението да не излезе на референдум и истиот да се прогласи за неуспешен. До самиот крај на референдумот, излезноста беше помала од очекуваното, со што се доведе во прашање неговата успешност. Крајните бројки покажаа излезност на само 25 граѓан(к)и повеќе од потребните половина од населението!
Конечните резултати од неуспешниот референдум во Валандово се: 4,683 гласачи излегле на референдумот, односно 46,15% од 10,141 граѓанки и граѓани запишани во Избирачкиот список. Причина за неуспешноста на референдумот се притисоците врз населението кои започнаа уште за време на кампањата за референдумот, а продолжија сè до затворањето на избирачките места на денот на референдумот.
