Комитетот за надворешни работи на Европскиот парламент, со 54 гласoви „за“ и осум „против“, утрово ја усвои Предлог резолуцијата за напредокот на Република Македонија во европските интеграции во 2016 година.
Европратениците во АФЕТ-комитетот претходно усогласија 28 компромисни амандмани (во однос на вкупно 318-те поднесени) кои денеска беа изгласани, а во нив се содржани и термини „Македонија“ и „македонски“, но исто така, и предвидување дека македонската држава наскоро ќе добие нова Влада, па се бара „транспарентна транзиција“.
Европарламентот, со оваа Резолуција ја потврдува осмата позитивна препорака на Европската комисија за отворање на преговорите за членство на Македонија во Европската унија, но со услов исполнување во целост на договорот од Пржино и на Итните реформски приоритети на ЕК. Како што известува дописникот на МИА од Брисел „ЕП ја потврдува својата недвосмислена и силна посветеност на процесот на пристапување на земјата во ЕУ“, како и дека „по две одложувања да се одржат предвремени парламентарни избори во Македонија, на 11 декември 2016 тие беа одржани во уредна и мирна атмосфера, во согласност со меѓународните стандарди и во согласност со препораките на ОБСЕ/ОДИХР и поминаа без поголеми инциденти, генерално беа добро спроведени а одѕивот на гласачите беше висок“.
Осмиот компромисен амандман, кој денеска беше усвоен, потврдува дека европратениците очекуваат „формирање на нова, стабилна и одговорна Влада и транспарентна транзиција, во согласност со уставните и законските барања и постапки“. Во овој компромисен амандман се повикуваат сите страни во Македонија „да се воздржат од какво било попречување во однос на ефективното функционирање на парламентот“.
Европскиот парламент ја повикува новата влада на Македонија да воспостави транспарентни и ефикасни линии на одговорност меѓу и во рамки на институциите, и препорачува правична застапеност на сите заедници во сите нивоа на јавната администрација.
Неколку компромисни амандмани се усвоени за безусловна и непречена работа на Специјалното обвинителство, на кое треба, според Резолуцијата „да му се даде време и сите ресурси за без опструкции да ја врши својата работа“, која, според компромисниот амандман 15, треба да доведе до „правна и политичка одговорност“.
Исто така, Европскиот парламент смета дека се потребни конкретни мерки, со цел да се постигне општествена кохезија меѓу различните етнички, национални и верски заедници во Македонија.
„ЕП ги потсетува владините и партиските лидери на своите заложби за целосно спроведување на Охридскиот рамковен договор на инклузивен и транспарентен начин, да се заврши задоцнетиот преглед без натамошно одлагање, вклучувајќи ги и политичките препораки и да се обезбеди доволен буџет за негово спроведување. Се осудува секој облик на иредентизам и секој обид да се распаднат различни социјални групи, и се нагласува важноста да се започне долгоочекуваниот попис без натамошно одлагање“, се бара во Резолуцијата за Македонија во ЕП.
Резолуциите на Европарламентот немаат правно дејство за сите држави, туку се само советодавни и може, но не мора да се земат предвид од другите ЕУ-институции и од земјите-членки на Европската унија.
