Пред денешното второ разгледување на македонската резолуција во Комитетот за надворешни работи на Европскиот парламент (АФЕТ-групата), за која утре треба да се гласа во Комитетот, европратениците усогласија 28 компромисни амандмани, кои содржат и термини „Македонија“, „македонски“ и слично, но исто така, и предвидување дека македонската држава ќе добие нова влада, па се бара „транспарентна транзиција“.
Компромисните 28 амандмани на текстот на известувачот Иво Вајгл, се замена за 318-те амандмани, поднесени на Предлог-резолуцијата за Република Македонија, во кои речиси две третини се од грчките и бугарските европратеници.
Попладнево, европратениците во Комитетот за надворешни работи ќе дебатираат и ќе се обидат за последен пат, да ги усогласат ставовите за македонската резолуција во Европскиот парламент, а утре ќе гласаат за неа. На 14-ти март во Европскиот парламент во Стразбур, целиот состав на парламентот ќе ја донесе резолуцијата на пленарна седница.
Како што известува дописникот на МИА од Брисел, најпрвин се бара во Резолуцијата да се најде дека „ЕП ја потврдува својата недвосмислена и силна посветеност на процесот на пристапување на земјата во ЕУ“, како и дека „по две одложувања да се одржат предвремени парламентарни избори во Македонија, на 11-ти декември 2016 тие беа одржани во уредна и мирна атмосфера, во согласност со меѓународните стандарди и во согласност со препораките на ОБСЕ/ОДИХР, и поминаа без поголеми инциденти, генерално добро спроведени, а одѕивот на гласачите беше висок“.
Во однос на очекуваните реформи на ЕУ во однос на правосудството, јавната администрација, основните права, добрососедски односи, медиумите и вработувањето на младите, се инсистира и „на преглед на охридскиот Рамковен договор“. А, за отворање на пристапните преговори за Македонија со Европската унија, наместо „безусловно“, како што се бараше претходно, сега, со компромисен амандман на Резолуцијата – „отворањето на преговорите за членство треба да се гарантира по исполнувањето на потребните услови“.
„Додека регионалната соработка и добрососедските односи се суштински елементи на процесот на проширување, на Процесот за стабилизација и асоцијација и на процесот на пристапување на земјата, билатералните спорови, не треба да се користат за да се попречи процесот на пристапување во ЕУ, ниту за отворањето на преговорите за членство, но да бидат соодветно опфатени во конструктивен дух и во согласност со стандардите на ЕУ и на ОН, а сите напори треба да водат кон одржување на добрососедските и меѓуетничките односи“, бараат европратениците.
Инаку, резолуциите на Европарламентот немаат правно дејство за сите држави, туку се само советодавни и може, но не мора да се земат предвид од другите ЕУ-институции и од земјите-членки на Европската унија.
