ВЕСТ НА ДЕНОТ
Во јули 2024 година продажните цени на производителите на индустриски производи на домашниот пазар се повисоки за 0,1 отсто на месечно ниво и за 3,5 проценти на годишно ниво.
Како мерка во борбата со високите цени и за подобрување на стандардот на граѓаните, Мицкоски се одлучи да упати апел до трговците максимално да ги намалат маржите на производите, но истовремено истакна дека Владата нема да интервенира во цените.
ИЗЈАВА НА ДЕНОТ
Борел: Оружјето што ѝ го даваме на Украина мора да биде искористено со целосен потенцијал
„Мораме да ги укинеме ограничувањата за употреба на оружје против руски воени цели, во согласност со меѓународното право. Оружјето што и го даваме на Украина мора да биде искористено до целосен потенцијал и да се укинат ограничувањата за да можат Украинците да ги нападнат местата од кои Русија ги бомбардира. Во спротивно, оружјето е бескорисно“, изјави Жозеп Борел пред денешната средба во Брисел на министрите за надворешни работи на земјите од ЕУ.
РЕГИОН
Премиерот е во прва официјална посета на Хрватска на средба со хрватскиот премиер Пленковиќ при што беа потпишани билатерални договори за соработка помеѓу министерствата за образование и наука и Министерството за здравје. Мицкоски и во оваа прилика не пропушти да се пожали дека повеќе од две и пол децении откако го почнавме овој пат [интеграцијата во ЕУ], за жал се уште сме во еден вртлог во којшто нема извесен крај, иако желбата на македонските граѓани да бидат дел од семејството на Европската Унија е голема, рече Мицкоски на средбата со Пленковиќ.
СВЕТ
Русија забрани влез на 92 државјани на САД, меѓу кои и новинари на најголемите американски медиуми
Русија денеска забрани влез на нејзина територија на 92 американски државјани, вклучително и новинари од неколку големи медиуми, поради наводно ширење „лажни информации“ за руската армија која се бори во Украина.
СЛОБОДНА ЗОНА
„Можеби во духот на постигнатиот договор за соработка помеѓу советниците (пред се од ВМРО -ДПМНЕ) во Град Скопје, и градоначалничката (која дојде на функција како кандидат од истата партија) ќе се изнајде соломонско решение по теркот на „генијалните“ измислици од времето на предходното владеење на ВМРО-ДПМНЕ со градот и државата, па ќе се реактивираат пајтоните и Липицанерите на поранешниот градоначелник Коце Трајановски. Ем еколошки, ем во духот на никогаш непрежаленото „Скопје 2014“3, пишува Драган Мишев во „ЈСП и такси превозот во Скопје пред колапс: Ако не, па да ги вратиме пајтоните на Коце“.
Подготви: Б. Јордановска
