ВЕСТ НА ДЕНОТ
Кривичниот совет при Основниот кривичен суд Скопје, постапувајќи по предлог на Основното јавно обвинителство Скопје донесе решенија за продолжување на мерка притвор против петте лица, осомничени за грабнувањата и убиствата на младата Вања Ѓорчевска од Скопје и пензионерот Панче Жежовски од Велес. Велибор Маневски, Влатко Кешишов и Боре Видевски се осомничени за грабнување и помагање на убиство и на Ѓорчевска и на Жежовски. Тие од почетокот на декември се во притвор во Шутка.
Продолжен е и притворот за Стефан Димковски кој е осомничен дека му помогнал на осомничениот за двојното убиство, Љупчо Палевски Палчо да избега во Турција. Меѓу осомничените е и таткото на Вања, Александар Ѓорчевски, кого обвинителството го сомничи дека помагал при грабнувањето на неговата ќерка, за сторено кривично дело Грабнување од чл. 141 ст.2 вв ст.1 од Кривичниот Законик.
ИЗЈАВА НА ДЕНОТ
„Нема пари во Буџетот за зголемување на платите на функционерите во 2024 година. Тоа значи дека тоа е одраз на политиката што ја најави Владата дека ќе има интервенции во законот тоа да не се случи во 2024 година. Нема пари за дополнителното зголемување според законот каде што секоја година им следи зголемување согласно усогласувањето со просечната плата. Нема пари во Буџетот планирани за дополнително зголемување на платите на функционери и именувани лица“ изјави министерот за финансии Фатмир Бесими.
ВОЈНА ВО УКРАИНА
Турција не дозволува влез во Црното Море низ Босфор на британските миноловци испратени како донација во Украина, иако пред почетокот на инвазијата истото го дозволи на руските воени бродови, кои потоа учествуваа во целосната воена инвазија врз Украина.
*
Генералниот секретар на НАТО Јенс Столтенберг на 10 јануари ќе свика состанок на дипломатите од земјите-членки на Алијансата и украински претставници, по серијата неодамнешни масовни руски воздушни напади врз оваа земја.
ФЛЕШ ВЕСТИ
ОДЛУКА Владата на денешната седница одлучила да престане да важи препораката за работа на продавниците, штандовите и киосците кои вршат трговија на мало за време на божиќните празници на 7 и 8 јануари 2024 година.
ОДБРАНА НАТО денеска најави дека ќе им помогне на своите членки да купат до 1.000 американски ракети „Патриот“ за подобро да се заштитат бидејќи Русија ги засилува воздушните напади врз Украина.
ИНВЕСТИЦИИ Највисока реализација на капитални инвестиции во однос на планираното во Буџетот е остварена минатата година. Реализацијата е на ниво од 97 проценти во однос на планираното, односно 707 милиони евра, соопшти денеска министерот за финансии Фатмир Бесими.
КОНФЛИКТИ
„Убиството на Салех ал-Ароури, врвен лидер на Хамас, ја лишува милитантната група од еден од нејзините највешти тактичари. Според аналитичарите, тој помогнал да испраќа пари и оружје до оперативците на Хамас во Појасот Газа и на други места на Блискиот Исток и поцврсто ја интегрирал групата во иранската мрежа на сили посветени на борбата против Израел“, пишуваа Драган Мишев во „Што значи смртта на лидерот на Хамас за милитантната група“.
ПРОПАГАНДА
„Новогодишна желба на македонските рашисти е по дома да им шетаат вагнеровци. Извесен Инквизатор на интернет платформата Х објави фотомонтирана фотографија од руската платеничката група Вагнер на која на руски јазик пишува: „Онаму каде што војската не може да оди, (Вагнер) ќе го отвори патот, Македонија“, додавајќи коментар „Ај да ги дочекаме годинава“, се вели во извештајот на ЦМТ „Новогодишна желба на македонските рашисти е вагнеровци да им шетаат по дома“.
СЛОБОДНА ЗОНА
„Како да е крајно време Eurocontrol, европската организација за безбедност на воздушната навигација, да ја преземе контролата врз македонското небо, нашата агенција да ја стави под принудна управа и конечно да запрат дилемите за тоа за што натаму повеќе ќе се грижи МАНАВ, за платите на децата на партиските функционери или за животот на авиопатниците!“, пишува Зоран Иванов ПО ДОПРЕН ГЛАС „За платите на децата на партиските функционери или за животот на авиопатниците“.
„Политичарите ни честитаа, а јас не можам а да се отргнам од чувството дека се искрени. Само различно ја толкуваме логичната врска меѓу посакуваните желби за среќа. Тие велат нека ви е среќна Новата Година затоа што ако сте среќни ќе гласате за нас и тогаш ние ќе бидеме среќни а ако сме ние среќни и вие поради тоа треба да сте среќни. Замрсено нели? Исто како нашата политичка сцена“, пишува Војо Маневски во колумната „На државата и честитавме ли среќна Нова Година?“.
Подготви: Б. Јордановска
