Во полн интензитет се градежните инфраструктурни зафати на граничниот премин Табановце – Прешево за проширување на пристапните сообраќајници.
Оваа акција е дел од мерките од „Отворен Балкан” што македонската и српската влада ги преземаат за побрз и полесен проток на возила и патници на овој високофреквентен граничен премин.
Градежните зафати се очекува да завршат пред почетокот на туристичката сезона.
Како што информираа од Царинската управа на почетокот од отпочнувањето на работите, во периодот што следи ќе започне да се применува и мерката за признавање на потврдите за вагање на товарните возила помеѓу Царинските управи на двете земји, со што ќе се намали времето за спроведување на царинските формалности.
Дополнително, Царинската управа работи и на воведување на концептот на т.н. паметни граници, што подразбира поставување нова опрема, односно нов систем за видео надзор и препознавање на регистарските таблички на возилата интегриран со читачи на кодови на документи, како и поставување на нови автоматизирани рампи и ваги.
Овие мерки ќе придонесат за забрзан проток на граничниот премин Табановце и намалување на трошоците на патниците и економските оператори, што ќе влијае позитивно на меѓународната трговска размена во регионот.
Извор: Фронтлајн
