Во контекст на изјавите на Милорад Додик, меѓу кои и онаа за српското издание на Раша Тудеј во Белград, директорот на Центарот за геополитички истражувања во Сараево, Адмир Лисица, во разговор за ЦивилМедиа изјави дека тоа се вообичаени популистички изјави.
Во интервју за балканскиот огранок на руската пропагандна телевизија Russia Today (RT Balkan), чие седиште е во Белград, Додик, изразувајќи ја, по којзнае кој пат, својата слепа лојалност кон Владимир Путин, ја искористи можноста да го отвори прашањето за границите на европско тло и повторно ја промовира својата стара идеја за одвојување на РС од БиХ и обединување со Србија, како што пренесе ЦивилМедиа на 17 јануари.
Ако можат Гренланд и Канада, ако можат Источна и Западна Германија, зошто РС не може сега да ѝ се придружи на Србија“, изјави Додик, додавајќи дека Русија има право и на Украина, во белградското студио на руската пропагандна ТВ станица РТ за која, инаку, постои забрана за емитување во демократскиот дел од светот.
Според Адмир Лисица, Додик се надева на поддршката од Виктор Орбан и другите радикални десничари низ Европа.
„Додик смета на поддршката од тврдокорната линија на Орбан кој, едноставно, стана синоним за десничарите во Европа. Се разбира, тој се надева и на подем на десницата во Европа. Тој и во изминатиот период испраќаше пораки со поддршка до радикалите ширум Европа“, изјави Лисица во ексклузивното јавување за ЦивилМедиа.
Според нашиот соговорник, Додик отворено ја радикализира својата позиција која се граничи со фашизам.
„Додик и неговата партија се отворено радикално десничарски и се граничат со фашизам. Тоа не е проблем само за Босна и Херцеговина, туку и за целиот Западен Балкан“, изјави експертот за геополитика.
Лисица ги открива надежите на Додик и во пресрет на враќањето на Доналд Трамп на чело на САД.
„Тој потајно очекува дека токму Трамп ќе биде тој што ќе му овозможи да успее во тоа што го прави овие години. Тој многу внимателно следи сѐ што се случува со и околу Трамп. Тој вложи и големи пари во контекст на лобирање, во надеж дека ќе се искачи на листата на приоритетите со сепаратистичките тенденции на Република Српска“, открива Лисица во разговорот за ЦивилМедиа.
Според извори на ЦивилМедиа во БиХ, Додик и неговите соработници досега потрошиле милионски суми во евра и долари за лобирање за поддршка од радикалните десничарски кругови на двете страни од Атлантикот, САД и Европа, вклучително и кај Доналд Трамп.
Логично беше прашањето за тоа колку се реални надежите и плановите на Додик за отцепување на Република Српска од Босна и Херцеговина. Според Адмир Лисица, тоа не се реалистични планови.
„Тој е далеку, далеку од реалноста. Но секако треба да биде аларм за ЕУ, НАТО и САД кои, ако се вистински пријатели на БиХ, треба овој сепаратист и сецесионист, Милорад Додик, кој е и отворен руски играч, да го изолираат и да го тргнат од политичката сцена. Тоа е единствениот начин да се зачува мирот и стабилноста“, препорачува Лисица.
Соговорникот на ЦивилМедиа, кој остана запаметен и по неговото учество на меѓународната конференција „Одбрана на демократијата и човековите права“ што се одржа минатиот декември во Скопје, не ги крие ниту мрачните прогнози за тоа што може да се случи ако плановите на Додик се реализираат.
„Верувајте, доколку настанат проблеми во БиХ, тоа ќе го почувствуваат и сите останати земји во регионот на Западен Балкан. БиХ не може да се распадне на мирен начин. Секој обид на Додик може да ескалира и да предизвика војна во Босна и Херцеговина“, прогнозира Лисица.
На оваа тема за ЦивилМедиа говореше и претседателот на СДА Македонија, Џелал Хоџиќ, кој, меѓу другото, изјави дека „политичката кариера на Додик е пред крај“ и дека овој радикален политичар „не е во состојба да ги спроведе великосрпските и руските аспирации на Балканот“.
Џабир Дерала
